اسلام آباد۔ 25 مارچ (اے پی پی) وزیر خارجہ شاہ محمود قریشی پارینے کہ پاکستان، ہنگری تون تینا ہڑتوم آ کنڈآتا تعلقداری و کثیر الجہتی بشخ آتیٹی ہڑتوم آ کنڈآتا کمکاری ءِ خاص اہمیت ایتک۔ ہڑتوم آ ملک آتا نیام اٹ توانائی، متبادل توانائی، انفارمیشن ٹیکنالوجی،فوڈ و سیل و سوات نا بشخ اٹی ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ءِ۔ وزیر خارجہ پنچ شنبے نادے آ وزارت خارجہ ٹی پاکستان وہنگری نا نیام اٹ واپاری و اقتصادی ونڈونا بنائی دود آن تران کریکہ۔ بنائی دود وزارت خارجہ ٹی اڈ ہلک۔ وزیر خارجہ شاہ محمود قریشی و اونا ہنگری نا ہم منصب پیٹر سجارتو(ویڈیو لنک انا کمک اٹ) اسہ وخت اٹی ہنگری۔پاکستان واپاری، اقتصادی ونڈو و اولیکو ہنگری۔ پاکستان بزنس فورم اٹی اسیجائی وڑاٹ بشخ ہلکر۔ شاہ محمود قریشی دود آن تران کرسا پارے کہ پاکستان ہنگری تون تینا ہڑتوم آ کنڈآتا تعلقداری و کثیر الجہتی بشخ آتیٹی ہڑتوم آ کنڈآتا کمکاری ءِ خاص اہمیت ایتک۔ وزیر خارجہ پارے کہ داونڈو نا ملنگ آن ہڑتوم آ ملک آتا نیام اٹ واپاری و اقتصادی کمکاری ءِ مون آ دننگ اٹ ودکی مسنے۔ ننے خوشی ءِ کہ ہنگری پاکستانی طالب علم آتے تعلیمی وظیفہ فراوان کننگ ءِ ہراڑآ نن ہنگری نا سرکڑدہ نا منت وار اُن۔ شاہ محمود قریشی پارے کہ نن پاکستان، ہنگری اسیجائی اقتصادی کمیشن نا ارٹ میکو دیوان نا میزبانی کن تیار اُن۔ وزیراعظم عمران خان نا وژن نا رداٹ نن تینا جغرافیائی سیاسی اولیت آتے جغرافیائی زرگزرانی اولیت آتیٹی بدل کننگ اُن وخت اس کہ کاروبار اٹی آسراتی نا جہانی درجہ بندی نا رداٹ پاکستان نا رینکنگ اٹی 28 درجہ گچینی بسنے۔ ہرا ننا مثبت اقتصادی پالیسی تا بھرم ءِ۔ شاہ محمود قریشی پارے کہ پاکستان و ہنگری نا نیام اٹ توانائی، گیگ بدل توانائی، انفارمیشن ٹیکنالوجی، فوڈ و سیل و سوات نا بشخ اٹی ہڑتوم آ کنڈآتا کمکاری ءِ ودفنگ نا بھلو وارخواہی اس ساڑی ءِ۔ ہڑتوم آ ملک آتا نیام اٹ بڑزکو کہولی رابطہ غاتا مون آ دننگ، ہڑتوم آ کنڈآتا واپار نا کچ اٹی ودکی نا سوب مننگ کیک۔ ہنگری نا وزیر خارجہ پارے کہ ہنگری نا بھلا فوڈ، ٹیکنالوجی، میڈیکل و آئی ٹی نا بشخاتون تعلقدار کمپنیک پاکستان اٹی زرکاری نا ارادہ تخرہ۔ فوڈ سیکورٹی نا بابت ہڑتوم آ کنڈآتا کمکاری ءِ مون آ دننگ کن ننا کشارییونیورسٹی، پاکستان نا ایگریکلچر کونسل تون رابطہ ٹی ءِ۔ ہنگری نا وزیر خارجہ چندی بشخ آتیٹی ہڑتوم آ کنڈآتا کمکاری ءِ مون آ دننگ نا بابت وزیر خارجہ مخدوم شاہ محمود قریشی نا کوشست آتیا اونا منت واری ءِ ہرفے۔ وزیر خارجہ مخدوم شاہ محمود قریشی ہنگری نا وزیر خارجہ جناب پیٹر سجارتو ءِ دورہ پاکستان نا سلہ خلک ہرادے او خوشی اٹ امنا کرے۔ ہنگری نا وزیر خارجہ پارے کہ او اسہ بھلو کاروباری ڈل اسے تون اوار زوت پاکستان آ بریک۔
