اسلام آباد۔ 25 مارچ (اے پی پی) صدر مملکت ڈاکٹر عارف علوی ڈیہہ ٹی امن و شونہالی نا پاکستان نا عزم انا درشانی ءِ کرسا پارینے کہ نن پاکستان تون اوار مچ آ ڈیہہ ٹی امن وسلامتی و شونداری نا خواہندار اُن۔ سویلی ایشیاء نا سرکڑدہ تعصب و مذہبی انتہاپسندی نا سیاست ءِ ہلے، ننا امن ناا ست خواہی ءِ نزوری تکنگپ، دفاعی بشخ اٹی خودانحصاری نا مزل ءِ دوئی کرینن۔ اسلاموفوبیا نا یکجا مرسا مقابلہ ءِ کننگے۔ داخیال آتا درشانی ءِ او یوم پاکستان نا رداٹ پریڈ آن مہمان خاص نا حیثیت اٹ تران کرسا کرے۔ صدر مملکت پارے کہ مچ آ قوم بشمول پاکستان نا فوج ءِ یوم پاکستان مبارک مرے۔ پریڈ اٹی بشخ ہلوک آ سنگت ملک آک و ہوابازآتا منت وار اُٹ۔ دا داہیت انا دلیل ءِ پاکستان نا شونداری و شونہالی کن سنگت ملک آک ننتون تفوک ءُ۔ اوپارے کہ یوم پاکستان مسلمانان ہند انا جتا ءُ تشخص و مذہبی آجوئی نا قول انا پوسکنی نا دے ءِ۔ دااولیکو جامع دستاویز ئس ہرانا بنداوآ ہندوستان نا مسلمان تا آخبت و آجوئی نا تعین ءِ کننگا۔ علامہ اقبال نا فکر و قائد اعظم نا کماشی ٹی 7 سال اٹی پاکستان جوڑ مس۔ صدر مملکت پارے کہ علمی، اقتصادی، سیاسی وراجی بشخ آتیٹی شونداری تون اوار اوار دفاعیبشخ اٹی خودانحصاری نا مزل ءِ دوئی کرینن۔ پاکستان ایٹمی واک اسے۔ اوپارے کہ ننا دلیر و نرزور فوج ننا خودداری و غیرت نا ڈیک ءِ۔ سلہہ بند فوج انا لمہ وطن نا دفاع کن قربانی تے خراج تحسین پیش کینہ۔ جنگ مرے یا خلفشار، تہہ نا امن و ایمنی، شکست یا قدرتی آفت نا حالیت مرے سلہہ بند فوج وطن عزیز نا رکھ و شونداری ٹی اہم ءُ کڑد اس ادا کرینے۔ صدر مملکت پارے کہ پاک فوج انا ورناک، مش، صحرا، دریا و فضاتیٹی ملکی دفاع کن دے و نن تیار ءُ۔ پاکستان نا سلہہ بند فوج دہشت گردی نا برخلاف جنگ اٹی سرسہبی دوئی کرے۔ آپریشن ردالفساد اٹی مچ آ ملک اٹی دہشت گردی نا نیٹ ورک ءِ نیست ونابود کرے ہرادے دنیا امنا کرینے۔ اوپارے کہ دنیا ءِ کورونا نا دین مون تروک ءِ۔ نن خصوصی آگاہی، نظم و ضبط و زمواری اٹ مزور آتا احساس ءِ کرسا دا دین انا مقابلہ ءِ کرین۔ نن کورونا دین انا زوت مون ءِ تورنہ ولے احتیاط المی ءِ۔ اوپارے کہ ملکی زرگزران نا شونداری کن سنبرینگوک اُن۔ دنیا نا حالیت ترندی اٹ بدل مننگ ءِ۔ سائنس و ٹیکنالوجی و حرفت اٹ شونداری تون اوار اوار سفارت و زرگزران نا بشخ آتیٹی ترندی اٹ بدلی رونما مننگ ءِ۔ ننے تینا ملک ءِ اسلامی میرات، قومی نظریات و روایت آتا پاس تخسا شونداری و پوسکنی ءِ کاریم اٹ اتسا اسلامی فلاحی جمہوری ملک اس جوڑ کننگ ءِ۔ اوپارے کہ شونداری و شونہالی کن یکجا و متحد مرین۔ نن پاکستان تون اوار مچ آ ڈیہہ ٹی امن و سلامتی و شونداری نا خواہندار اُن۔ اوپارے کہ جارحانہ عزم، تین پہ تینی جھیڑہ، تعصب و دہشت گردی مچ آ ڈیہہ نا حالیت آتے بھس کرینے۔ پاکستان پرامن بقائے باہمی نا اصول آ جوڑ مس۔ سویلی ایشیانا سرکڑدہ تعصب و مذہبی انتہاپسندی نا سیاست ءِ ہلے۔ اوپارے کہ نن نیک نیتی اٹ ڈیہہ ٹی امن و شونہالی نا خواہندار اُن۔ ننا دا است خواہی ءِ نزوری تکنگپ۔ ہرجارحیت نا پورو واک اٹ ورندی ءِ ایتنہ۔
