اسلام آباد۔ 24مارچ (اے پی پی) صدر مملکت ڈاکٹرعارف علوی تون برونائی دارالسلام نا دزکش مروک آ ہائی کمشنر بریگیڈیئر جنرل (ر) محمود سیدین چارشنبے نادے آ داڑے سپاروکی اوڑدہی کرے۔ داوخت آ گپ وتران کرسا صدر مملکت پاکستان وبرونائی دارالسلام نا نیام اٹ واپاری و زرگزرانی تعلقداری تے ودفنگ نا گرج آ زور شاغسا پارے کہ ہڑتوم آ برادر ملک آتا تین پہ تینی فائدہ کن زرگزرانی و واپاری تعلقداری ءِ بایدے متنوع جوڑ کننگے۔ اوپارے کہ پاکستان و برونائی دارالسلام اٹی گچین تعلقداری اسیجائی قدر، مذہب و جہانی امن و سوگوی کن اسیجائی است خواہی تیامبنی ءِ۔ پاکستان اٹی کشت وکشار نا بشخ سوگو ءِ و برونائی دا بشخ اٹی پاکستان نا آزموندہ غان فائدہ ہرفنگ کیک۔ صدر مملکت پاک برونائی انویسٹمنٹ کمپنی نا پاکستان نا زرگزرانی شونداری ٹی اہم کڑد آ است جمی نا درشانی ءِ کرے و برونائی دارالسلام نا الس ناراجی آسراتی ٹی پاکستانی ڈاکٹر آتا کڑد ءِ ہم تالان کرے۔ صدر مملکت ہڑتوم آ ملک آتا نیام اٹ زرگزرانی تعلقداری تا مون آ دننگ و کمکاری ءِ سوگو کننگ آ دزکش مروک آ ہائی کمشنر نا خذمت آتا ستاءِ کرے۔ صدر مملکت السی رابطہ غاتے مون آ دننگ و دودوربیدگی ہن و برتا گرج آ زور شاغا۔
