اسلام آباد ہائی کورٹ چیئرمین سینیٹ الیکشن نا بابت یوسف رضا گیلانی نا درخواست ءِ ناقابل سماعت گوندسامسترد کرے

اسلام آباد۔ 24مارچ (اے پی پی) اسلام آباد ہائی کورٹ چیئرمین سینیٹ الیکشن نا بابت سید یوسف رضاگیلانی نا درخواست ءِ ناقابل سماعت گوندسا مسترد کرینے۔ چارشنبے نادے آ اسلام آباد ہائی کورٹ نا چیف جسٹس اطہرمن اللہ چیئرمین سینیٹ نا الیکشن نا بابت ڈک کروک فیصلہ ءِ جاری کرینے۔ عدالت نوشتہی فیصلہ ٹی درخواست ءِ ناقابل سماعت گوندسا خارج کرینے۔ عدالت آن جاری مروک آ نوشتہی فیصلہ ٹی پاننگانے کہ گمان ءِ گچین مروک آ نمائندہ و سیاسی سرکڑدہ عدالت ءِ اوار کننگ آن بیدس تنازعہ غاتے ایسر کننگ نا کوشست کیرہ۔ سماعت اٹی سینیٹر یوسف رضاگیلانی نا وکیل فاروق ایچ نائیک و جاوید اقبال وینس عدالت اٹ پیش مسر۔ فاروق ایچ نائیک ایڈووکیٹ پارے کہ 12مارچ آ چیئرمین سینیٹ گچین کاری مس ہراٹی صادق سنجرانی ءِ چیئرمین ڈیکلیئر کننگا، 7وونٹ آتے مسترد کرسا یوسف رضاگیلانی نا باتننگ نا پڑو ءِ کرے، پریزائیڈنگ آفیسر خانہ نا تہہ ٹی پن آ اسٹیمپ خلنگ آ وونٹ آتے مسترد کرے، چیف جسٹس استفسار کرے کہ ہراکانود نا رداٹ دا گچین کاریک مسنو؟ ہراڑآ وکیل پارے کہ آئین نا آرٹیکل 60 انا رداٹ دا گچین کاریک مسنو۔ داوخت آ عدالتی پارت آ فاروق ایچ نائیک آئین ناآرٹیکل 60ءِ خوانا و پارے کہ صدر جی ڈی اے آن سید مظفر حسین شاہ ءِ بطور پریزائیڈنگ آفیسر پن کرے۔ چیف جسٹس استفسار کرے کہ انت الیکشن کمیشن نا کنڈآن کس اس دا پروسیس اٹ اوار ئس؟ ہراڑآ فاروق ایچ نائیک پارے کہ الیکشن کمیشن آن ہچ کس دا پروسیس اٹ اوار الوکہ، وونٹ امر مارک مریک دانا ذکر رولز اٹی ساڑی اف، چیف جسٹس اطہر من اللہ ریمارکس تس کہ پارلیمنٹ نا پروسیڈنگ ءِ استثنیٰ دوئی ءِ آرٹیکل 69آن امر پیشن ہلنگ کینہ؟ فاروق ایچ نائیک پارے کہ چیئرمین سینیٹ نا گچین کاری پارلیمنٹ نا کارروائی اف، ننے پریزائیڈنگ آفیس پارے کہ باکس انا تہہ ٹی ہراڑے مرے مہر خلبو، نن بیان حلفی تسن کہ پریزائیڈنگ نا رداٹ باکس انا تہہ ٹی پن آ مہر خلین یا مون آ، چیف جسٹس پارے کہ انت یوسف رضاگیلانی ءِ سینیٹ اٹ گیشتری دوئی ئس؟ وکیل پارے کہ یوسف رضاگیلانی ءِ الیکشن نا دے ہم و اینو ہم سینیٹ اٹی گیشتری دوئی ئس، چیف جسٹس پارے کہ اگہ یوسف رضاگیلانی تون اکثریت ارے تو او صادق سنجرانی ءِ اینک کننگ کیک، انت آئین اٹی متبادل فورم اف؟فاروق ایچ نائیک پارے کہ ننتون ہچ ءُ متبادل فورم اس اف بیرہ عدالت فیصلہ کننگ کیک کہ وونٹ سہی مسترد مسر یا آخا، چیف جسٹس پارے کہ پارلیمنٹ بھلا ویل آتے ایسر کننگ کن ءِ انت تینا ویل ءِ ایسر کننگ کپک، انت عدالت ءِ پارلیمانی ویل آتیٹی نیام تموئی مرے، چیف جسٹس استفسار کرے کہ چیئرمین سینیٹ ءِ اینک کننگ نا انت وڑوڈول ءِ؟ یوسف رضاگیلانی کیس اٹی ہم سپریم کورٹ پارلیمنٹ نا پروسیڈنگ نا بابت آبزور کریسس، فاروق ایچ نائیک پارے کہ الیکشن کن صدر پریزائیڈنگ آفیسر پن کرے چیئرمین نا ہچ ءُ کڑد اس الوکہ، ہچ ءُ پروسیجر اس ساڑی اف کہ امر اسٹیمپ خلوئی ءِ، سیکرٹری سینیٹ تینٹ پارے کہ ننے کہ خانہ ٹی ہراڑے مرے مہر خلنگ کینہ، پریزائیڈنگ آفیسر نا فیصلہ ءِ چیلنج کننگ مریک، نن داسہ الیکشن نا پروسیس ءِ چیلنج کرینن، چیئرمین سینیٹ ءِ بیرہ بے پت اٹ اینک کننگ مریک، چیف جسٹس پارے کہ پارلیمنٹ آ بے گرج تنقید داعدالت کپک، چیف جسٹس اطہرمن اللہ استفسار کرے کہ انت نما سینیٹ اٹی کمیٹی ارے ہرادامعاملہ ءِ ہُننگ کے، انت ڈپٹی چیئرمین نا وونٹ اٹی ہم ہنداوڑمسوسس، فاروق ایچ نائیک پارے کہ ڈپٹی چیئرمین نا کیس اٹی صورتحال جتا ءِ، کمیٹی تون اختیار اف کہ او چیئرمین ءِ اینک کننگ کے، چیف جسٹس پارے کہ پارلیمنٹ قومی لیول آ ایشوز ایسر کننگ نا فورم ءِ تینا معاملہ ءِ انت ایسر کننگ کپک؟عدالت پارلیمنٹ نا وتواجہی نا بابت زیات احتیاط اٹ کاریم ہلیک، فاروق ایچ نائیک پارے کہ ہراتم کسرآک بند مریر تو آئین تینٹ کشک۔