مریم نواز نا نیب پیشی نا وخت آ پنجاب حکومت نا درخواست آ رینجرز تعیناتی نا منظوری ءِ تسنے، بنجائی وزیر داخلہ شیخ رشید احمد نا پریس کانفرنس

اسلام آباد۔ 24مارچ (اے پی پی) بنجائی وزیر داخلہ شیخ رشید احمد پارے کہ مریم نواز نا نیب پیشی آ (ن) لیگ حکومت ءِ آخا بلکن پیپلزپارٹی ءِ طاقت نشان تننگ خواہک، لاہور والاتے پاننگ اُٹ کورونا ترندی اٹ تالان مننگ ءِ اسلام آباد، لاہور، پشاور و کراچی ٹی ریڈ الرٹ ءِ، حقی سیاستدان ہمو مریک ہرا ملک اٹی زندو کہیک، اسلام آباد و راولپنڈی نا صحافی تیکن میڈیا سٹی اس جوڑ کننگ اُن۔ چارشنبے نادے آ اسلام آباد اٹی پریس کانفرنس آن تران کرسا وزیر داخلہ پارے کہ مریم نواز نا نیب پیشی نا وخت آ پنجاب حکومت نا درخواست آ رینجر زتعیناتی نا منظوری تسنے، داصوبائی ءُ ویل اسے، اسلام آباد آ بروسر تو ننا ویل مسکہ، (ن) لیگ تینا ہی اُرا ٹی پاورشو و دنگل کننگ والا ءِ، تدوک آ پیشی آ میڈیا اوفتا گاڈی تیٹی خل تا ڈھیر اس نشان تس، داعمران خان ءِ آخا بلکن پیپلزپارٹی کن شو آف پاور کننگ خوارہ، اپوزیشن عمران خان کن گچینی نا کسر جوڑ کیک۔ شیخ رشید پارے کہ مریم نواز تینٹ تو حفاظتی ضمانت کرفے و کارندہ غاتے پاننگ ءِ کہ مون آ ببو حالانکہ حقی سیاست دان تو الس نا اسپر مریک، الس ءِ اسپر جوڑ کپک، کس اس شرارت کتو تو کانود حرکت اٹی بفک۔