پاک امریکہ تین پہ تینی تعلقداری تے پین سوگو کننگک، چیئرمین سینیٹ محمد صادق سنجرانی تون امریکن ڈیموکریٹس پارٹی نا ڈل انا اوڑدہی

اسلام آباد۔ 24 مارچ (اے پی پی) چیئرمین سینیٹ محمد صادق سنجرانی تون طارق جاوید نا کماشی ٹی امریکن ڈیموکریٹس پارٹی نا 8 باسکی ڈل پارلیمنٹ ہاؤس اٹی اوڑدہی کرے۔ امریکی ڈل محمد صادق سنجرانی ءِ دُوارہ بڑزکو ایوان نا چیئرمین گچین مننگ آ مبارکبادی تسر۔ امریکی ڈل ڈپٹی چیئرمین سینیٹ مرزا محمد آفریدی ءِ ہم ڈپٹی چیئرمین مننگ آ مبارکبادی تسر۔ اوڑدہی ٹی چیئرمین سینیٹ پارے کہ ہڑتوم آ ملک آتا نیام اٹ تین پہ تینی تعلقداری ءِ پین سوگو کننگک۔ چیئرمین سینیٹ محمد صادق سنجرانی پارے کہ پاکستان اٹی جمہوریت نا مون آ دننگ کن نمان گام گیج کننگانے و اقوام عالم اٹ دہشت گردی نا چٹفنگ و امن کن پاکستان اہم کڑد ادا کرینے۔ اوڑدہی ٹی امریکی ڈل پارے کہ پاکستان اٹی جمہوریت ءِ مون آ دننگ انگ ءِ ہراڑآن الس نا نئے بیرہ ویل آک ایسر مریرہ بلکن ملک شونہالی نا کنڈآ ہِننگ ءِ۔ ڈل پاکستان نا سرکڑدہ غا پت انا درشانی ءِ کرسا پارے کہ پاکستان امن نا بابت ہراگام گیج آتے کرینے او ستاکڑزرہ۔ امریکی ڈل پارے کہ پاکستان و امریکہ نا تعلقداری وخت اتون زیات سوگو مننگ ءِ و پوسکن آ امریکی سرکڑدہ پاکستان تون ہڑتوم آ کنڈآتا تعلقداری تے پین سوگو کننگ خواہک۔ اوپارے کہ جوبائیڈن انتظامیہ پاکستان تون گچین تعلقداری تا خواہندار ءِ۔ پارلیمنٹ ہاؤس نا دورہ ءِ کروک آ امریکی ڈل امریکی سینیٹر آتا جوزہ خیرخواہی نا کلہو چیئرمین سینیٹ محمد صادق سنجرانی و ڈپٹی چیئرمین ءِ سرکریر۔ ڈل چیئرمین سینیٹ ءِ معلومدار کرے کہ امریکہ ٹی بے شمار پاکستانی خذمت سرتننگ ءُ و امریکہ ٹی رہینگوک آ پاکستانی تا ویل آتے جوان وڑاٹ ایسر کننگ انگ ءِ۔ ڈل چیئرمین سینیٹ محمد صادق سنجرانی و ڈپٹی چیئرمین سینیٹ مرزا محمد آفریدی ءِامریکہ نا دورہ ءِ کننگ نا سلہ خلکر ہرادے چیئرمین سینیٹ امنا کرے۔