بنجائی دارالحکومت و پنجاب نا 9 ضلع غاتیٹی 11 اپریل اسکان تعلیمی ادارہ غاک بند مریرہ، بورڈ انا امتحانک شیڈول نا رداٹ مریرہ، بنجائی وزیر تعلیم و کسبی تربیت شفقت محمود نا میڈیا ءِ بریفنگ

اسلام آباد۔ 24 مارچ (اے پی پی) بنجائی وزیر تعلیم و کسبی تربیت شفقت محمود پارینے کہ بنجائی دارالحکومت اسلام آباد و پنجاب نا 9 ضلع غاتیٹی 9اپریل اسکان تعلیمی ادارہ غاک بند مریرہ۔ داخیال آتا درشانی ءِ او نیشنل کمانڈ اینڈ آپریشن سینٹر اٹی وزرائے تعلیم نا دیوان آن پد میڈیا ءِ احوال اٹی پارے۔ بنجائی وزیر پارے کہ دیوان اٹی امنائی وڑاٹ فیصلہ کننگانے کہ ہراشار تیٹی تعلیمی ادارہ غاتے کورونا دین انا رداٹ بند کننگاسس اوداسہ 11 اپریل اسکان بند مریرہ۔ اوپارے کہ داضلع غاتیان بیدس اگہ پین ضلع سے ٹی کورونا کیس آتیٹی ودکی مریک تو او صوبائی حکومت نا صوابدید مریک۔ شفقت محمود پارے کہ این سی او سی نا دیوان اٹی بورڈ انا امتحان تا بابت ہم دا فیصلہ ءِ کننگانے کہ نہہ، دہ، یانزدہ و دوانزدہ جماعت نا امتحانک صوبائی حکومت و بورڈ انا پڑوکروک شیڈول نا رداٹ مریرہ۔ اوپارے کہ نن ناجوڑی نا حالیت آتا جاچ ءِ ہلسا کینہ وننے داہیت انا پورو سما ءِ کہ چناتا تعلیم نا نسخان مننگ ءِ ولے چناتا جان جوڑی ءِ اولیت ایتنہ۔ اوپارے کہ مچ آ ملک اٹی ہراہرا ضلع و شار تیٹی تعلیمی ادارہ غاتے بند کننگک اونا فیصلہ ءِ صوبائی حکومت، آزاد کشمیر و گلگت بلتستان نا حکومت تینٹ کیک۔ اوپارے کہ داکان مست این سی او سی مخصوص ضلع غاتیٹی 15 مارچ آن 28 مارچ اسکان اسکول آتون اوار ہر وڑنا تعلیمی ادارہ غاتے بند کننگ نا فیصلہ کننگاسس ولے اینو مروک آ دیوان اٹی غٹ گڑاتا جاچ ءِ ہلنگ آن پد فیصلہ کننگاکہ تعلیمی ادارہ غاک پین 11 اپریل اسکان بند مریرہ و دامخصوص ضلع غاتیان بیدس ایلو علاقہ غاتے ہم اوار کننگ مریک۔ داکان مست بنجائی وزیر تعلیم و کسبی تربیت شفقت محمود نا کماشی ٹی کورونا نا حالیت آتا جاچ ءِ ہلنگ کن اہم ءُ دیوان اس نیشنل کمانڈ اینڈ کنٹرول سینٹر(این سی اوسی) ٹی مس۔ دیوان اٹی ہر چار آ صوبہ غاتا وزرائے تعلیم و جان جوڑی، گلگت بلتستان، آزاد جموں کشمیر نا وزیرآک، بڑزکو کمامدارآک بشخ ہلکر۔ دیوان اٹی بنجائی سیکرٹری تعلیم فرح حامد خان، پارلیمانی سیکرٹری تعلیم وجیہہ قمر و چیئرمین ایچ ای سی ئسک ہم ساڑیءُ۔ صوبائی وزیر تعلیمک ویڈیو لنک انا کمک اٹ دیوان اٹی بشخ ہلکر۔