وزیراعظم نا سلاہکار بابر اعوان نا کماشی ٹی پیشن نا ملک پاکستانی تے وونٹنگ ناحق تننگ و ای وونٹنگ نا چرجوئی ٹی بڑزکوکہولی دیوان

اسلام آباد۔ 24مارچ (اے پی پی) وزیراعظم عمران خان نا پارت آ وزیراعظم ناسلاہکار بابر اعوان نا کماشی ٹی چارشنبے نادے آ وزارت پارلیمانی امور اٹی پیشن نا ملک پاکستانی تے وونٹنگ نا حق تننگ و ای وونٹنگ نا چرجوئی ٹی بڑزکو کہولی دیوان اس اڈ ہلک۔ دیوان اٹی تعلقدار بشخ آتا سروک آک بشخ ہلکر۔ وزارت پارلیمانی امور آن جاری بیان نا رداٹ دیوان اٹی فیصلہ کننگانے کہ ای وونٹنگ نا گام گیج آتے دمدستی وڑاٹ پورو کننگ کن دوشنبے نادے آ وزارت پارلیمانی امور اٹی ایلو تعلقدارادارہ غاتون میٹنگ اس اڈ تننگک ہراٹی تعلقدار ادارہ بشمول نادرا، وزارت سائنس و ٹیکنالوجی، وزارت انفارمیشن ٹیکنالوجی،الیکشن کمیشن آف پاکستان و اوورسیز پاکستانیز ڈویژن نا کمامدار آک بشخ ہلیرہ۔ داوخت آ وزیراعظم نا سلاہکار پارلیمانی امور ڈاکٹر بابر اعوان پارے کہ پیشن نا ملک پاکستانیک ملک انا میرات ءُ ہرافتے حکومت ہر حال اٹ جمہوری عمل اٹ شریک کیک و اوفتاگچین کاری ٹی بشخ ہلنگ ءِ پک کیک ہراڑکن ای وونٹنگ نا چرجوئی ٹی حکومت زوت آن زوت کانودی و انتظامی ریسہ غاتے پورو کیک۔ وزیراعظم نا سلاہکار داتم اسکان مروک آ کارکڑد نا پورو جاچ ءِ ہلک و داعمل ءِ زوت آن زوت پوروی اسکان سرکننگ نا پرمان جاری کرے۔