اوغانستان اٹی امن عمل نا بحالی نا ساڑی آ کوشست ستاکڑزک، پاکستان

اقوام متحدہ۔ 24 مارچ (اے پی پی) پاکستان اوغانستان اٹی بے چیٹی نا چٹفنگ کن امن عمل نا بحالی نا ساڑی آ کوشست آتے ستاکڑزوک گوندسا خبڑدار کرینے کہ سازشی زموارآک امن مذاکرات و سیاسی تصفیہ ءِ توننگ کن اڑنگ شاغنگ کیرہ۔ اقوام متحدہ ٹی پاکستان نا آخبتی مندوب منیر اکرم اقوام متحدہ نا سیکرٹری جنرل انتونیوگوتریش نا کابل اٹی تینا خصوصی نمائندہ ڈیبورالیونز نا اوغانستان اٹی حالیت آتیا ویڈیو لنک بریفنگ آن پد سلامتی کونسل اٹی تینا بیان ءِ جمع کرفسا غٹ فریق آتیا زور شاغا کہ او اوغانستان اٹی جنگ بندی کن پرتشدد کارروائی تیٹی کمتی کن کوشست کیر۔ پاکستانی مندوب پارے کہ اوغانستان اٹی بے چیٹی نا چٹفنگ کن امن عمل نا بحالی نا ساڑی آ کوشست ستاکڑزک، ولے سازشی زموارآک امن مذاکرات و سیاسی تصفیہ ءِ توننگ کن اڑنگ شاغنگ کیرہ۔ اوپارے کہ اوغانستان اٹی پرتشدد کارروائی تا برجاسلنگ آن اوغانستان و اوکان پیشن سازشی زموار آتا دُوسوگو مریک و اوفتے امن مذاکرات نا کسر اٹ اڑنگ شاغنگ و اوغانستان اٹی جامع سیاسی تصفیہ ءِ توننگ اٹ سوگوی ملک۔اوپارے کہ ننے داوڑنا تا برخلاف تینا رکھ ءِ کروئی مریک ہرا اوغانستان اٹی جمہوریت و انسانی حق انا رکھ انا بہانہ غا امن تصفیہءِ توننگ خوارہ و اوغانستان نا گل زمین ءِ اونا ہمسایہ ملک آتا برخلاف کاریم اٹ اتنگ خوارہ۔ پاکستانی مندوب پارے کہ دہشت گردی اوغانستان و اونا ہمسایہ ملک آتیا تباہ کن اثرمرتب کرینے۔ اوپارے کہ پاکستان جہانی برادری نا داعزم آن امنا کیک کہ او القاعدہ، داعش و ایلو عسکریت پسند رڑتے اوغان گل زمین ءِ ملک اسے دھڑکو تننگ یا جلہو کننگ کن کاریم اٹ اتنگ نا موکل تفک۔ اوپیدوار وڑاٹ بھارت ءِ ذہن اٹ تخسا پارے کہ ہرافک اینو دہشت گردی آ غوغا کننگ ءُ ہموفک اوغانستان اٹی دہشت گردی ءِ برجاتخنگ خوارہ۔ اوپارے کہ داہیت است ہسونی نا سوب ءِ کہ سلامتی کونسل ءِ دہشت گردی نا کمک کروک آتا بابت شاہدی تے زیر غور اتنگ آن توننگا۔ پاکستانی مندوب پارے کہ امن عمل ءِ پک کننگ کن چندی چیلنج و پدریسہ بے سہبی تیان پد ہم اوغان فریق آتے ہراڑے سیاسی تصفیہ نا دوئی کننگ نا ممکنہ کوشست کروئی مریک ہموڑے امن عمل نا مخالف آتے مذاکرات نا میز آ اتنگ آن پیشگی سیاسی تصفیہ نا گمان آک کم مریرہ۔ اوپارے کہ پاکستان اوغانستان اٹی امن عمل نا کوشست آتا رداٹ تدوک آ سال امریکہ و طالبان نا نیام اٹ امن معاہدہ نا بنا و اودے ایسر اسکان سرکننگ و اوکان پد انٹرااوغان مذاکرات کن کمکاری کرے و داچرجوئی ٹی پاکستان اوغانستان اٹی ہروڑنا جامع سیاسی تصفیہ کن اوغان راہشون و طالبان تا نیام اٹ امنائی سلاہ نا مخ تفی ءِ کیک۔ پاکستانی مندوب پارے کہ اوغان شاریک پیشن نا نیام تمنگ آن بیدس تینا مزل نا تعین ءِ کننگ و تینا آخبت نا فیصلہ ءِ کیر۔