اسلام آباد۔ 23مارچ (اے پی پی) چین، ترکی، امریکہ، فرانس، جاپان، بھارت، ابوظہبی، اوغانستان، سری لنکا، ہانگ کانگ تون اوار مچ آ دنیا نا پاکستانی سفارتی مشن آتیٹی یوم پاکستان ءِ ملی جم و جوش اٹ اڈتننگا۔ سے شنبے نادے آ پیشن نا ملک پاکستان سفارتی مشن تیٹی یوم پاکستان نا دود اڈ ہلک۔ داوخت آ قومی بیرک ءِ بڑز کننگا و صدر مملکت و وزیراعظم پاکستان نا کلہو آتے خوانسا بنفنگا۔ پاکستانی سفیر آک و بشخ ہلوک آک دادے انا اہمیت ءِ تالان و تحریک پاکستان نا راہشون تے خراج عقیدت پیش کریر۔ 81 می یوم پاکستان نا وخت آ بیجنگ اٹی پاکستانی سفارت خانہ ٹی بیرک ءِ چست کننگ نا دود اس اڈ ہلک۔ دود اٹی پاکستانی برادری نا باسک آک و چین و پاکستانی میڈیا نا نمائندہ غاتون اوار مہمان تا بھلو کچ اس بشخ ہلکر۔ پاکستان نا سفیر معین الحق تحریک پاکستان نا راہشون تے خراج عقیدت پیش کرے۔ 23مارچ 1940ء نا اہمیت ءِ تالان کرسا اوپارے کہ دا ہمو دے ئس ہراتم سویلی ایشیانا مسلمانک قائد اعظم محمد علی جناح نا متحرک کماشی ٹی تینکن اسہ جتا ءُ وطن اس جوڑ کننگ نا فیصلہ کریر۔ پاکستانی سفیر غیر کانودی بھارتی مقبوضہ جموں و کشمیر نا الس تون یکجہتی نا درشانی ءِ کرے و کشمیر کاز اکن تینا اخلاقی، سیاسی و سفارتی مخ تفی ءِ برجاتخنگ نا عزم انا درشانی ءِ کرے۔ سفیر مستی پارے کہ داسال پاکستان و چین تینا تین پہ تینی تعلقداری تا جوڑ کننگ نا 70 می سال دے ءِ اڈتننگ ءُ۔ داہڑتوم آ ملک آتیکن اسہ اہم ءُ مزل نا نشا ن اسے ہرانئے بیرہ ہڑتوم آ ملک آتا نیام اٹ ساڑی سوگو برادرانہ تعلقداری ءِ اڈتننگ بلکن متنوع بشخ آتیٹی ودوک آ کمکاری کن مون آ ہِننگ نا سوب ءِ۔ ہنداوڑ چینگ دو، گوانگ ژو، ہانگ کانگ و شنگھائی ٹی پاکستانی قونصل خانہ غاتیٹی ہم بیرک ءِ چست کننگ نا دود اڈ ہلک۔ امریکہ ٹی پاکستانی سفارت خانہ نا کنڈآن دود آن تران کرسا پاکستان نا سفیر اسد مجید خان پارے کہ پاکستان امن و سلامتی و پائیدار اقتصادی شونداری نا کنڈآ ہنوک آ ہمو ملک ءِ ہراڑے الس نا لائخی، قدرتی وسیل و جغرافیائی محل و وقوع آن فائدہ ہرفسا ڈیہہ نا واپاری مرکز جوڑ کننگ کن پبی چکار کننگ انگ ءِ۔ پاکستان نا سفیر اوغانستان اٹی امن کن اوغان تا کماشی ٹی و اوغان تیا تالان سیاسی تصفیہ نا گرج آ زور شاغا۔
