اسلام آباد۔ 23 مارچ (اے پی پی) بنجائی وزیر و چیئرمین کشمیر کمیٹی شہریار خان آفریدی پارینے کہ او یوم پاکستان آ مچ آ پاکستانی قوم خاص وڑاٹ کشمیری ایلم و ایڑھ تے مبارکبادی پیش کیک، کشمیر 1947نا تقسیم نا بے پورو ایجنڈا ءِ، کشمیر نا آجوئی کن ہروڑاٹ کوشست ءِ برجاتخنہ، یوم پاکستان آ قول کینہ کہ کشمیری تا ہروڑاٹ سفارتی، اخلاقی و سیاسی کمک ءِ برجاتخنہ، اینونادے ننے داملک انا جوڑ مننگ اٹ ننا بزرگ آتا تروک آ قربانی تا یات ترفک۔ سے شنبے نادے آ یوم پاکستان نا وخت آ تینا کلہو اٹی شہریار خان آفریدی پارے کہ ہندا سوب ءِ کہ نن مقبوضہ کشمیر نا رہینگوک آتیا مروک آ بھارتی ظلم انا مذمت ءِ کینہ و کشمیری تا جہد آجوئی ءِ سلام پیش کینہ، نظریہ پاکستان پاکستان نا جوڑ مننگ نا بنداو جوڑ مس، ہرانا رداٹ مسلمان سرکڑدہ غاک ہندوتوا ذہنیت نا کوزہ ٹی رہینگ آن انکار کریر و جتا ءُ مملکت اس جوڑ کننگ کن جہد کریر۔ شہریارخان آفریدی پارے کہ مقبوضہ کشمیر نا حریت پسند آتا قربانیک زیان مفسہ، کشمیری حریت پسند آتا قربانی تے سلام پیش کینہ۔ ننا ایمان ءِ اہل مقبوضہ کشمیر بھاز زوت آجو فضاٹی ساہ ہلیک۔ شہریار خان آفریدی پارے کہ بھارتی مقبوضہ کشمیر نا مخلوق اینو ہم پاکستان تون اواری اٹ یوم پاکستان ءِ اڈتننگ ءُ، یوم پاکستان نا وخت آ مقبوضہ کشمیر اٹی جاگہ جاگہ غا پاکستان نا مخ تفی ٹی خلوک آ پوسٹر و جھنڈاک داہیت انا شاہدی ءُ۔
