اسلام آباد۔ 23مارچ (اے پی پی) وزیر خارجہ شاہ محمود قریشی پارینے کہ قرارداد پاکستان ننا قومی و تاریخی است خواہی تا ڈیک ءِ۔ 23 مارچ نا دے قوم اکن اسہ اہم ءُ مزل نا نشان اسے نا حیثیت تخک۔ قومی سلامتی نا رکھ و ملک ءِ شونداری نا کنڈآ دننگ کن سنبرینگوک اُن۔ سے شنبے نادے آ یوم پاکستان 23 مارچ 2021ء نا وخت آ وزیر خارجہ اسہ کلہو اسے ٹی پارے کہ 23 مارچ نا دے قوم اکن اسہ اہم ءُ مزل نا نشان اسے نا حیثیت تخک۔ دادے آ نن آجو وطن اسے نا دوئی کننگ کن تینا باوہ پیرہ نا ہموقربانی تے تازہ کینہ ہرافتا بنا1940ء ٹی تاریخی قرارداد پاکستان آن مس و آخرکار 7 سال انا چنکو وخت اسے ٹی اسہ جتا ءُ آزاد مملکت اسے نا دوئی کننگ ممکن مس۔ قرارداد پاکستان ننا قومی و تاریخی است خواہی تا ڈیک ءِ۔ دادے آ نن قائد اعظم ؒ، غٹ سرکڑدہ، بزرگ، شہید و تینا ہیروتے زبردست وڑاٹ خراج تحسین پیش کینہ ہرافک عظیم ءُ قربانی ترسا آزاد مملکت نا تغ ءِ عملی ءُ دروشم اس تسر۔ دادے ننے داموقع ہم فراوان کیک کہ نن تینا ملک ءِ حقی فلاحی، شون پسند و شونہال ریاست جوڑ کننگ نا عزم ءِ پوسکن کین۔ داوخت آ ای داہیت انا درشانی ءِ کننگ خواوہ کہ ساڑی پاکستانی سرکڑدہ غاتا مچ آ چکار ”پوسکن آ پاکستان“ وژن نا رداٹ السی راجی آسراتی آٹے۔ وزیر خارجہ پارے کہ قومی سلامتی نا رکھ اکن ہم نن پورو وڑاٹ سنبرینگوک اُن۔ ننا چکار، جغرافیائی سیاسی اولیت آتیان جغرافیائی اقتصادی اولیت آتیا ٹی ءِ۔ ساڑی حکومت پاکستان ءِ شونداری نا کنڈآ دننگ کن سنبرینگوک ءِ۔ پاکستان امن و سوگوی، شونداری شریداری و تین پہ تینی رابطہ غاتے مون آ دننگ نا پالیسی تیا عمل کننگ ءِ۔ دادے آ نن اقوام متحدہ نا سلامتی کونسل نا قرارداد آتیٹی تروک آ حق خودارادیت نا حق انا جہد اٹ تینا کشمیری ایلم و ایڑھ تتون ہم یکجہتی نا درشانی و اوفتا مخ تفی ءِ کینہ۔ اوپارے کہ بلاشبہ داوخت آ کورونا کون آ دین مچ آ دنیا کن اسہ چیلنج اس جوڑ مسنے۔ دا دین جہانی یکجہتی و کمکاری نا پوسکن ءُ وارخواہی اس ہم فراوا ن کرینے۔ پاکستان دا ہلوک آ دین ءِ پورو شکست تننگ کن زیات آن زیات جہانی کہول آ کمکاری نا گرج آ زور شاغک۔ قوم تیا مشکل وخت بریک ولے او داحالیت آتا یکجا مرسا مقابلہ ءِ کیرہ۔ پاکستانی قوم کورونا دین انا مقابلہ ءِ کننگ کن بھلو زمواری اسے نا درشانی ءِ کرینے۔ شاہ محمود قریشی پارے کہ دُن تو کورونا دین آن انسانی جان تے خطرہ مون تروک ءِ ہنداخاطرآن نن رکھی گام گیج آتا اہمیت ءِ گوجالنگ ءِ سگپنہ۔
