اسلام آباد۔ 23 مارچ (اے پی پی) سینیٹ نا چیئرمین محمد صادق سنجرانی پارے کہ بزنس کمیونٹی ملک انا زرگزرانی شونداری ٹی اہم ءُ کڑد اس ادا کننگ ءِ و داہیت انا باوری کرفے کہ او کاروباری بشخ ءِ مون تروک اہم ویل آتے ایسر کرفنگ اٹ ہروڑاٹ کمک کیک تانکہ کاروباری تپہ صنعت و واپار ءِ مون آ درسا زرگزرانءِ بحال کننگ اٹ فعال کڑد ادا کننگ کیر۔ داخیال آتا درشانی ءِ او اسلام آباد چیمبر آف کامرس اینڈ انڈسٹری نا اسہ ڈل اسے تون گپ وتران کرسا کرے ہراچیمبر نا صدر سردار یاسر الیاس خان نا کماشی ٹی اوڑتون اوڑدہی کریر۔ چیمبر نا سینئر نائب صدر فاطمہ عظیم و نائب صدر عبدالرحمان خان تون اوار ایگزیکٹو باسک عمر حسین، اویس خٹک و محمد جاوید اقبال ڈل اٹی اوار ئسر۔ محمد صادق سنجرانی پارے کہ او سینیٹ نا قائمہ کمیٹی واپار تون کاروبار نا اببت ایلو قائمہ کمیٹی تیٹی آئی سی سی آئی ءِ نمائندگی تننگ آ سجفک تانکہ کانود سازی نا عمل اٹ نجی بشخ انا سلاہ و سلابت ءِ ہم اوار کننگے۔ اوپارے کہ حکومت زرگزران نا بحالی آ خصوصی چکار کننگ ءِ، و پوریا گر برادری و سول سوسائٹی تون اوار غٹ اسٹیک ہولڈر آتا کمک اٹ غٹ زرگزرانی چیلنج آتا مون ءِ توننگ کن سبنرینگوک ءِ۔ اوپارے کہ حکومت کمکار نا کڑد ءِ ادا کیک وخت اس کہ زرگزران ءِ مون آ دننگ اٹ نجی بشخ ءِ اہم کڑد ادا کروئی مریک۔ اوبزنس کمیونٹی نا فائدہ غاتا رکھ اکن آئی سی سی نا کڑد انا ستاءِ کر ے و باوری کرفے کہ او کاروباری بشخ انا اہم ویل آتے ایسر کرفنگ نا کوشست آتیٹی چیمبر تون پبی کمک کیک۔ داوخت آ تینا خیال آتا درشانی ءِ کرسا اسلام آباد چیمبر آف کامرس اینڈ انڈسٹری نا صدر سردار یاسر الیاس خان پارے کہ کورونا دین انا ودی کروک مشکل آتیان پد ہم پوریاگر صنعت کار برادری زرگزرانی سرجزآتے بحال کننگ کن پبی کوشست کننگ ءُ۔ ولے اوفتے کاروبار ءِ مون تروک ویل آتے ایسر کننگ و واپار و برآمد آتا گچین مون آ دننگ کن حکومت نا خڑکی کمک نا گرج ءِ۔ اوپارے کہ پارلیمنٹ آن کانود سازی نا عمل اٹی نجی بشخ انا فائدہ غاتا گچین رکھ ءِ پک کننگ کن سینیٹ و قومی اسمبلی نا قائمہ کمیٹی تیٹی ملک انا غٹ بھلا چیمبرز آف کامرس اینڈ انڈسٹری ءِ گچین نمائندگی تننگے۔
