اسلام آباد۔ 23 مارچ (اے پی پی) بنجائی وزیر کانود و انصاف بیرسٹر فروغ نسیم پارینے کہ قرارداد پاکستان سویلی ایشیاء نا مسلمان تا تاریخ اٹی اسہ اہم ءُ موڑ اس پک مس، اینوننے بھاز انگا چیلنج مون تروک ءِ۔ نن داحالیت آتیٹی ہم کانود نا حاکمیت ءِ برجاتخنگ کن پورو عزم اٹ کاریم کننگ اُن۔ داخیال آتا درشانی ءِ او یوم پاکستان نا وخت آ تینا کلہو اٹی کرے۔ اوپارے کہ اینو نا دے ہمودے ءِ ہراتم سویلی ایشیانا مسلمانک قول کریر کہ غلامی نا زمزیر ءِ پرغنہ۔ ننا باوہ پیرہ غاک دادے آ قائد اعظم نا کماشی ٹی دافیصلہ کریر کہ اوفتے جتا ءُ وطن اسے نا گرج ءِ۔ اسہ ہندن ءُ وطن اس ہراڑے اللہ نا حاکمیت و خواجہ محمد ﷺ نا پاروک آ اصول آتا رداٹ چلیفنگ مرے۔ اوپارے کہ قرارداد پاکستان سویلی ایشیانا مسلمان تا تاریخ اٹی اہم ءُ موڑاس پک مس۔ دانا بیرہ 7 سال آن پد پاکستان جوڑ مس۔ دادے عزم و قول انا اہمیت ءِ تالان کیک۔ اوپارے کہ اینو ننے بھاز انگا چیلنج مون تروک ءِ۔ نن کورونا دین اتون جنگ تننگ اُن۔ دادین آن مچ آ دنیا نا زرگزران و شونداری آ خراب ءُ زہم تمانے۔ اوپارے کہ داحالیت آتا مقابلہ ءِ بیرہ تینا عزم و ثابت گامی اٹ کننگ مریک۔ نن داحالیت آتیٹی ہم کانود نا حاکمیت ءِ برتخنگ کن پورو عزم اٹ کاریم کننگ اُن۔ اوپارے کہ نن الس نا اڑزان و زوت انصاف اسکان رسینگ ءِ آسان کننگ کن جہد کننگ اُن۔ نن انشاء اللہ ضرور سرسہب مرینہ۔
