صدر مملکت ڈاکٹر عارف علوی نا یوم پاکستان نا وخت آ قوم انا پن کلہو

اسلام آباد۔ 23 مارچ (اے پی پی) صدر مملکت ڈاکٹر عارف علوی پارینے کہ اینو نن پاکستان ءِ زرگزرانی وڑاٹ سوگوو شونہال ملک اس جوڑ کننگ و بانیان وطن نا بصیرت نا رداٹ جمہوری قدر، کانود نا حکمرانی و اسلامی زند انا وڑ ءِ برقرار تخنگ نا قول ءِ کینہ۔ سویلی ایشیاء ٹی پائیدار امن کن جموں و کشمیر نا جھیڑہ نا سلامتی کونسل نا تعلقدار قرارداد آتارداٹ ایسری اہم ءُ حیثیت تخک۔ قوم کورونا نا بابت غٹ رکھی گام گیج آتیا عمل کے تانکہ کورونا نا مسٹ میکو ریسہ نا مون ءِ توننگ مرے۔ یوم پاکستان، 23 مارچ 2021ء نا وخت آ قوم انا پن کلہو اٹی صدر مملکت پارے کہ یوم پاکستان نا وخت آ، نن بانیان پاکستان ءِ خراج عقیدت پیش کینہ ہرانا خذمت و قربانی تیان برصغیر نا مسلمان تیکن اسہ جتا ءُ وطن اس جوڑ کننگ ممکن مس۔ اینو نن پاکستان ءِ اسہ زرگزرانی وڑاٹ سوگو و شونہال ملک اس جوڑ کننگ نا تینا عزم انا درشانی ءِ کینہ۔ اوپارے کہ داتاریخی دے آ، نن تینا راج ءِ پاکستان اٹ رہینگوک آ اقلیت آتیکن انسانیت دوست، جامع و روادار کننگ نا جہد ءِ برجا تخنگ نا قول ءِ کینہ۔ نن تینا بانیان وطن نا بصیرت نا رداٹ تینا ملک اٹی جمہوری قدر، کانود نا حکمرانی و اسلامی زند انا وڑ ءِ برقرار تخنگ نا ہم قول کینہ۔ صدر مملکت پارے کہ دادے آ نن تینا کشمیری ایلم تے ہم یات تخن ہرافتے ہندوستانی سیکورٹی فورس آک ہفت دہائی آن محکوم کرینو۔ اوفتے بدترین جور و ریاستی دہشت گردی نا شست کننگانے۔ نن تینا کشمیری ایلم تا حق خودارادیت نا ساف جہد اٹی اوفتا مخ تفی ءِ برجاتخنگ نا عہد کینہ۔ غیر کانودی وڑاٹ مقبوضہ جموں و کشمیر اٹی بھارت نا کنڈآن انسانی حق انا لتاڑتا دنیانوٹس ءِ ہلے۔ سویلی ایشیا ٹی پائیدار امن کن جموں و کشمیر نا جھیڑہ نا سلامتی کونسل نا قرارداد آتا رداٹ ایسری اہم ءُ حیثیت اس تخک۔ صدر عارف علوی پارے کہ اینو نن تینا ہیروز خاص وڑاٹ جان جوڑی نا بشخ اتون گنڈوک کارندہ و ایلو تعلقدار ادارہ غاتے ہم سلام پیش کینہ ہرافک کوویڈ۔ 19 نا تالانی ءِ توننگ کن اہم کڑد ادا کریر و دامشکل وخت اٹی مخلوق ءِ درمان فراوان کننگ اٹ بھلو کڑد اس ادا کریر۔ نن تینا جان جوڑی بشخ انا پروفیشنل آتا کوشست آتا ستا ءِ کینہ ہرافک داتنکی ٹی قوم انا بے مٹ خذمت ءِ کریر۔ اوپارے کہ ای تینا ہم وطن آتیان خواست کیوہ کہ کورونا نا بابت غٹ رکھی گام گیج آتیا عمل کیر تانکہ کورونا نا مسٹ میکو ریسہ نا مون ءِ توننگ مرے۔ کنے یقین ءِ کہ سیوت ایمان و تنظیم نا کمک اٹ نن تینا کسر اٹ بروک آ ہر چیلنج نا مون ءِ توننگ کینہ۔