اسلامی جمہوریہ پاکستان نا وزیراعظم عمران خان نا یوم پاکستان 23 مارچ 2021ء نا وخت آ کلہو

اسلام آباد۔ 23 مارچ(اے پی پی) وزیراعظم عمران خان یوم پاکستان، 23 مارچ انا بابت قوم انا پن تینا کلہو اٹی پارینے کہ ننے قائد اعظم محمد علی جناح نا تروک آ ”سیوت، ایمان و تنظیم“ نا اصول آتیا عمل کننگ نا گرج ءِ، ننا وژن پاکستان ءِ ریاست مدینہ نا وڑاٹ اسہ حقی ءُ جمہوری فلاحی ریاست اسے ٹی بدل کننگ ءِ، ننا عظیم قوم مستین اٹ سیوت و پبی عزم انا کمک اٹ سخت انگا چیلنج آتا سرسہبی اٹ مون ءِ تورینے، اینو ننے دا دین اتون مون تننگ کن سوگو مننگ نا گرج ءِ، ہرا مچ آ دنیاءِ تینا پلویڑ اٹی ہلکونے۔ وزیراعظم پاکستان پارے کہ 23 مارچ، 1940اسہ یات گار ءُ موقع اس ئس ہراتم برصغیر نا مسلمانک تینے ہندوتوا ذہنیت نا جور و غلامی نا شکنجہ غان آجو کننگ کن اسہ جتا ءُ وطن اسے نا جوڑ کننگ نا فیصلہ ءِ کریر، اینو نن بابائے قوم و تحریک آجوئی نا ہمو غٹ راہشون تے خراج تحسین پیش کینہ ہرافک برطانوی ہند انا مسلمان تے یکجا کریر و اسہ آجو مسلم ریاست اسے نا جوڑ کننگ کن جہد کریر۔ داجہد اٹی 14 اگست 1947ء آ دنیا نا نقشہ غا پاکستان جوڑ مس۔ اوپارے کہ دادے آ نن بھارتی مقبوضہ جموں و کشمیر نا کودک مخلوق تون ہم یکجہتی نا درشانی ءِ کینہ ہرافک بھارتی سیکورٹی فورس آتا کنڈآن بدترین ریاستی جور اتون مون تننگ ءُ، نن اوفتا جیرت و ہمت ءِ سلام پیش کینہ و اقوام متحدہ نا سلامتی کونسل نا تعلقدار قرارداد آتا رداٹ اوفتا حق خودارادیت نا دوئی کننگ کن کشمیری الس نا اخلاقی، سیاسی و سفارتی مخ تفی ءِ برجاتخنہ۔ اوپارے کہ دادے ءِ اڈترسا ننے قائد اعظم محمد علی جناح نا تروک آ ”سیوت، ایمان و تنظیم“ نا اصول آتیا عمل کننگ نا گرج ءِ، ننا وژن پاکستان ءِ ریاست مدینہ نا وڑآ اسہ حقی جمہوری فلاحی ریاست اسے ٹی بدل کننگ ءِ۔ ننا عظیم قوم مستین اٹ سیوت و پبی عزم انا کمک اٹ سخت انگا چیلنج آتا سرسہبی اٹ مون ءِ تورینے، اینو ننے دادین اتون مون تننگ کن سوگو مننگ نا گرج ءِ ہرامچ آ دنیا ءِ تینا پلویڑ اٹی ہلکونے، انشاء اللہ نن آزمائش نا دا ساہت اٹ ہم سرسہب مرینہ۔ ببو، اینو نن پاکستان ءِ کانود ناحکمرانی، میرٹ نا بالادستی، بریبری و رحمدلی آ مبنی ریاست مدینہ نا وڑآ انسان دوست، شون پسند و شونہال ریاست اس جوڑ کننگ کن تینا عزم ءِ پوسکن کین۔ اللہ تعالیٰ ننے غٹ آزمائش آتیٹی ثابت گام مننگ نا توفیق ایتے۔