اسلام آباد۔ 22 مارچ (اے پی پی) وزیر ریلوائی اعظم خان سواتی پارینے کہ ریلوائی ناسفر ءِ آسراتی تیان شپ کینہ، مزور آتا راجی آسراتی کن گام گیج کننگ اُن۔ پی آئی ڈی ٹی پریس کانفرنس آن تران کرسا وزیر ریلوائی پارے کہ ریلوائی نا ادارہ غان مون انگا میل تا محاسبہ ءِ کینہ، ریلوائی نا نسخانءِ زوت چٹفسا کٹیائی ءُ ادارہ اس جوڑ کینہ، ریلوائی نا اسہ انچ اس ہم ڈغار ءِ سودا کننگپک ولے دا ڈغار ءِ داوڑکاریم اٹ اتینہ کہ دانا فائدہ مرے، ریلوائی ٹکٹ آتا نظام ءِ ڈیجیٹلائز کننگ انگ ءِ، ریلوائی ایف ڈبلیو او تون ایم او یو آ دستخط کرینے۔ ریلوائی اسٹیشن تے پوسکن آ وڑوڈول آتیا استوار کننگک، مسہ تُو انا تہٹی 30 ارب روپئی کٹیا کننگ نا ہدف مقرر کرینن، 40 ارب کٹیا کننگ نا گنجائشت ءِ، اِرا ہزار ویگن بالکل تیار تموکءُ ہرافتے پی ایس او کاریم اٹ اتپننگ ءِ، اگہ پی ایس او کاریم اٹ اتے تو 3 ارب نا فائدہ مریک۔
