اسلام آباد۔ 19 مارچ (اے پی پی) پاکستان و کویت تعلیم، جان جوڑی، واپار و زرگزران اٹی کمکاری ءِ ودفنگ نا گرج آ زور شاغسا ہڑتوم آ برادر ملک آتا تین پہ تینی فائدہ ٹی ہڑتوم آ کنڈآتا تعلقداری تے پین ودفنگ آ امنا کرینو۔ داامنائی سلاہ جمعہ نادے آ صدر مملکت ڈاکٹر عارف علوی و کویتی وزیر خارجہ شیخ ڈاکٹر احمد نصیر المحمد الاحمد الجابر الصباح نا ایوان صدر اٹی اوڑدہی ٹی مس۔ ایوان صدر آن جاری اعلامیہ نا رداٹ پاکستان وکویت تعلیم، جان جوڑی، واپار و زرگزران اٹی کمکاری ءِ ودفنگ نا گرج آ زور شاغانو۔ ہڑتوم آ برادر ملک آک تین پہ تینی فائدہ کن ہڑتوم آ کنڈآتا تعلقداری تیٹی پین ودکی اتنگ آہم امنا کرینو۔ داوخت آ گپ وتران کرسا صدر مملکت ڈاکٹر عارف علوی پارے کہ پاکستان کویت تون خوشگوار و برادرانہ تعلقداری تے بھاز اہمیت ایتک۔ پاکستان برادر ملک کویت تون تعلقداری تے پین مون آ دننگ خواہک۔ اوپارے کہ تعلیم، جان جوڑی و سائنس نا بشخ آتیٹی کمکاری ءِ ودفنگ نا لائخی ساڑی ءِ۔ پاکستان کویت ءِ کسبکاری افرادی قوت و ایلو کسبی بندغ تننگ کیک۔ اوپارے کہ پاکستان کویت نا فوجی کارندہ غاتے تینا فوجی ہیلکاری ادارہ غاتیٹی تربیت فراوان کننگ کیک، گوادر بندرگاہ و سی پیک آن پاکستان نا زرگزرانی و جغرافیائی اہمیت اٹی ودکی مس۔ صدر مملکت پارے کہ کویت سی پیک نا ڈٹ آتیٹی زرکاری آن زرگزرانی فائدہ ہرفنگ کیک۔ صدر ممکت مقبوضہ جموں و کشمیر اٹی بھارتی ظلم و انسانی حق انا لتاڑتے توننگ کن بھارت آ زور شاغے۔ کویتی وزیر خارجہ پارے کہ ایماندار امیر شیخ صباح الاحمد الصباح نا کزیت آ ہڑزخواہی کن کویت بننگ آ صدر مملکت نا منت وار اُن۔ کویت نا شونداری ٹی پاکستانی کمیونٹی نا اہم کڑد و کویتی شونداری پروگرام نااہم ءُ بشخ اسے ءُ۔
