بلوچستان حکومت کورونا کیس آتا مون ءِ توننگ کن غٹ وسیلہ غاتے کاریم اٹ اتنگ ءِ
کوئٹہ۔ 19 مارچ (اے پی پی) صوبائی پارلیمانی سیکرٹری حوالکاری بشریٰ رند پارینے کہ کورونا دین انا مسٹ میکو ریسہ و کیس آتیٹی ساڑی آ ودکی ءِ مون آ تخسا الس رکھی گام گیج اختیار کے حکومت نا کنڈآن جاری کروک ایس او پی تیا عملدرآمد ءِ پک کننگے صوبہ ٹی کورونا نا ودوک آ کیس آتیا گڑتی ءِ۔ صوبائی حکومت دا مرض انا مون ءِ توننگ کن غٹ وسیلہ غاتے کاریم اٹ اتنگ ءِ ۔ محکمہ جان جوڑی حکومت بلوچستان و جہانی ادارہ جان جوڑی نا راہشون اصول آتیا عمل کرسا ہی کورونا دین انا مون ءِ توننگ مریک صوبہ ٹی کورونا کیس مون آ بننگ نا کچ اٹی ودکی آن ہڑدے ئی زند زہمی مننگ کیک۔ داخیال آتا درشانی ءِ او اے پی پی تون گپ وتران کرسا کرے۔ صوبائی پارلیمانی سیکرٹری حوالکاری بشریٰ رند مستی پارے کہ کورونا نا خطرہ داسکان چٹتنے الس ایس او پی تیا عمل کرسا تینا و تینا خاہوت نا رکھ اکن حکومتی گام گیج آتون تفر۔ تدوک آ کیہی تُو انا خواری آن صوبہ ٹی کورونا کیس آتیٹی کمتی واقع مسوسس ولے مسٹ میکو ریسہ بننگ آن مخلوق ءِ مست آنبار حکومتی احتیاطی تدابیر تیا عمل کننگ نا سخت گرج ءِ۔ اوپارے کہ صوبہ ٹی کورونا کیس آتیا پدریسہ چاروکی تخانن دا چرجوئی ٹی صوبائی حکومت ہڑدے ئی بنداو آ الس اٹ رکھی گام گیج اختیار کننگ نا بابت آگاہی مہم اس چلیفنگ ءِ۔ داکان بیدس ہیلتھ ورکرآتا ویکسینیشن آن پد 60 سال آن زیات وئی نا بندغ آتے ویکسینیشن نا عمل برجاءِ۔ اوپارے کہ صوبائی حکومت نا وخت آ و سنجیدہ گام گیج آتا سوب آن کورونا کنٹرول اٹی ءِ۔ ودانا چٹفنگ اسکان حکومت آرام اٹ تولپک۔ الس حکومت نا جاری کروک رکھی گام گیج آتیا عمل کرسا کورونا ءِ شکست ایتر۔
