اسلام آباد۔ 19 مارچ (اے پی پی) حکومت چنا و زالبول آتے جان جوڑ غذا نا فراوانی ءِ پک کننگ کن پبی گام گیج کرینے، جان جوڑ غذانا فراوانی کن صوبہ، شونداری شریدار، بنجائی وزارت و قوم تا نیام اٹ رابطہ کاری و شریداری ءِ اولیتی بنداو تیا مون آ دننگ انگ ءِ۔ جمعہ نادے آ وزارت قومی جان جوڑی نا کمامدارآک ’’اے پی پی‘‘ ءِ پاریر کہ بروک آ چین ءِ جان جوڑ کننگ و جان جوڑ غذا نا کاریم اٹ اتنگ ءِ پک کننگ نا رداٹ غٹ تعلقدار ادارہ و شریدار آتے پارت جاری کننگانے انتئے کہ غٹ شاری تے جان جوڑ غذا نا فراوانی ہرحکومت و ریاست نا زمواری مریک۔ کمامدارآک پاریر کہ وزیراعظم عمران خان نا کماشی ٹی حکومت صوبہ غاتون اواری اٹ ایکشن پلان اس تیار کرینے ہرانا رداٹ صوبہ غاتون تین پہ تینی سلابت اٹ عملدرآمد کن کاریم برجاءِ۔ اوفک پاریر کہ ملک اٹ جان جوڑ و آب اٹ خور انا فراوانی کن غٹ سیاسی جماعت آتون اوار راج انا غٹ تعلقدار فریق آتے ہم تینا کڑد ءِ ادا کروئی مریک انتئے کہ آب اٹ و جان جوڑ غذاتا دوئی مفننگ نا سوب آن پاکستان اٹی کیہی ناجوڑیک ودی مننگ ءُ داحالیت آتا توننگ کن ننے تینا کڑد ءِ ادا کروئی مریک۔ اوفک پاریر کہ بنجائی حکومت غذائیت و غذائی تقویت نا غٹ پروگرام تیٹی صوبہ غاتا پبی کمک ءِ کننگ ءِ۔ داسہ غٹ صوبہ غاتون تینا تینا منظور مروک غذائی پروجیکٹ ارے و مچ آ ملک اٹی غذائی کاختی نا ویل ءِ ایسر کننگ کن کاریم برجاءِ ہرانا جوانءُ نتیجہ اس مون آ بننگ ءِ۔
