اسلام آباد۔ 19 مارچ (اے پی پی) وزیر خارجہ مخدوم شاہ محمود قریشی پارینے کہ اگہ بھارت کشمیر نا ویل انا ایسری نا بابت تینا سوچ آ نظرثانی و داڑکن سازگار چاگڑد اس ودی کے تو پاکستان ہم مذاکرات آن پدی مفک۔ ڈیہہ نا حالیت آتا بابت جمعہ نادے آ اہم ءُ بیان اسے ٹی وزیر خارجہ پارے کہ بھارت 5 اگست 2019ء آ، مقبوضہ جموں و کشمیر اٹی گڑاس ہندن ءُ اسہ کنڈی گام گیج کرے ہرافتے غٹ کشمیریک یکسر مسترد کریر۔ وزیراعظم عمران خان منصب ءِ سنبھالنگ تون بھارت ءِ سلہ خلک کہ او امن نا کنڈآ اسہ گام اس مونی برے تو نن اِرا گام مونی برینہ، ولے افسوز کہ بھارت سرکار داسوچ انا مخ تف الوکہ۔ شاہ محمود قریشی پارے کہ بھارت نا ہندا رویہ جمود نا سوب مس۔ پاکستان و بھارت نا نیام اٹ جمود نا دا فضاءِ چٹفنگ نازمواری ہم بھارت آ عائد مریک۔ وزیر خارجہ پارے کہ اگہ بھارت تینا سوچ آ نظرثانی کننگ و ہندن ءُ سازگار چاگڑد اس ودی کننگ کن تیار ءِ ہراٹی کشمیر نا ویل اتون اوار ویل انا پرامن ایسری کن ہیت وگپ مننگ کیک تو پاکستان ہم مذاکرات و ڈائیلاگ آن پدی مفک۔ شاہ محمود قریشی پارے کہ ہڑتوم آ ملک آتا ڈی جی ایم اوز نا رابطہ غان پد سیز فائر معاہدہ نا بحالی، اسہ گچین ءُ پیش رفت اسے۔ سیز فائر خلاف ورزی تیان زیات نسخان لائن آف کنٹرول آ رہینگوک آ کشمیری و ہمو کودک شاری تا مسکہ ہرافتے بھارتی فوج انا کنڈآن بلاتخصیص شست کننگاکہ۔ مخدوم شاہ محمود قریشی پارے کہ امن نا کوشست ہمووخت اسکان سودمند مننگ کپک ہراتم اسکان ہڑتوم آ ملک آتا سرکڑدہ است اٹ رضامند مفس، ہروئی دادے کہ نن برصغیر نا مخلوق تینا آخبت نا بارواٹ سجفنگ کن تیار اُن یا آخا؟۔
