اسلام آباد۔ 19 مارچ (اے پی پی) وزیراعظم نا خصوصی کمکار سیاسی امور ڈاکٹر شہباز گل پارینے کہ پنجاب پیری اربن ہاؤسنگ اسکیم نا رداٹ چنکا شار و خلق آتیٹی نزور و دیہاڑی دار تپہ غاتے چھت تننگ کن اولیکو ریسہ ٹی 26 تحصیل اٹی 3 ہزار کینال آ تالان ڈٹ انا بناء اپریل آن مریک، صحافی تیکن فراش ٹاؤن اٹ 4 ہزار فلیٹ تفنگک، مستین اٹ تیناتے پلاٹ تننگا داسہ میرٹ آ فلیٹ تننگ انگ ءِ۔ داخیال آتا درشانی ءِ او جمعہ نادے آ داڑے پریس کانفرنس آن تران کرسا کرے۔ شہباز گل پارے کہ الس ءِ ہرہفتہ ہاؤسنگ ڈٹ آتیا پیش رفت انا بابت سرجم معلومدار کننگک۔ اوپارے کہ منہ سال اٹی انفارمیشن ٹیکنالوجی نا بشخ اٹی انقلاب اس بسنے و دا انقلاب حکومت نا کنڈآن سازگار چاگڑد اس فراوان کننگ نا نتیجہ ٹی بسنے۔ اوپارے کہ ساڑی حکومت تعمیرات نا بشخ انا شونداری و اوٹی ترندی اتنگ کن وڑوڈول اس پیدوار کرینے۔ ہاؤسنگ نا بشخ اٹی وام انا فراوانی نا نظام اٹی گچینی ایسونن تانکہ الس ءِ آسراتی فراوان کننگ مرے۔ اوپارے کہ امریکہ نا جی ڈی پی نا 80 درسد وام ہاؤسنگ نا بشخ ءِ تننگک وخت اس کہ بھارت اٹی 12 درسد وام دا بشخ اکن تننگک۔ پاکستان اٹی بھاز کم تعمیرات نا بشخ اکن تننگک۔ لس شاری ہم وام نا دوئی کننگ اٹ ویل و زیات سود شرح کٹیا مننگ نا سوب آن وام ہلنگ آن خلیرہ ولے ساڑی حکومت شرح کٹیا ٹی نمان کمتی کرینے۔ دا بشخ ءِ مون آدننگ کن وام تیا شرح کٹیا ٹی پین کمتی ہم اتنگک۔ اوپارے کہ وزیراعظم عمران خان نا 50 لکھ اُراتا ویژن آ عملدرآمد نا رداٹ پوسکن آ پاکستان ہاؤسنگ اتھارٹی نظام اس وضع کرینے۔ داسہ شاریک منہ کاغد ترسا آن لائن وڑاٹ آسانی اٹ وام دوئی کننگ کیرہ۔ حکومت نا دا پالیسی آن تعمیراتی بشخ اٹی انقلاب اس بریک و حکومت نا 50 لکھ اُرا واسہ کروڑ ملازمت فراوان کننگ نا قولءِ پورو کننگ اٹ کمک رسینگک۔ اوپارے کہ مستین نا حکومت آتا پالیسی و ساڑی پالیسی تیٹی پیدوار پرخ ارے۔ مستین اٹ منظور نظر بندگ آتے پلاٹ تننگا۔ بھلا شار تا شونداری آ چکار کننگا و چنکا شار تے گوجالنگا۔ اوپارے کہ پنجاب پیری اربن اسکیم نا بناءِ کننگ انگ ءِ ہرانا رداٹ چنکا شار و خلق آتیٹی دیہاڑی دار مزور و نیزگار شاری تے چھت تننگک۔، اولیکو ریسہ ٹی 20 ضلع غاتا 26 تحصیل آتیٹی 3 ہزار کنال آ اپریل آن دا ڈٹ آ کاریم نا بناءِ کننگ انگ ءِ۔ دا ڈٹ انا رداٹ پوسکن آ پاکستان ہاؤسنگ اسکیم ءِ 21 ہزار 700 درخواست دوئی مسنے ہرافتیان 10 ہزار 239 درخواست آتے شارٹ لسٹ کننگانے۔ کم کٹیا والا نیزگار بندغ آتے دا فلیٹ آتے 14 لکھ اٹ تننگک۔ حکومت اول اسہ لکھ اُراتیا 3 لکھ روپئی سبسڈی ہم فراوان کیک۔ دا اُراتا ماہانہ قسط 5700 روپئی مریک۔ اوپارے کہ داسہ سرکاری ڈغار بھلا مگرمچھ آتے رسینگپک بلکن اوفتیا نیزگار مخلوق ءِ اُراجوڑ کینہ ایتنہ۔ اوپارے کہ صحافی تیکن فراش ٹاؤن اسلام آباد اٹی 4 ہزار فلیٹ آتیا تالان ڈٹ آ کاریم اپریل اٹ بناکیک۔ صحافی تے 27 لکھ روپئی ٹی تیار مروک اُرافراوان کننگک۔ پوسکن آ پاکستان ہاؤسنگ اتھارٹی و سی ڈی اے اواری اٹ ڈٹ آ کاریم کننگ ءُ۔ اوپارے کہ پوسکن آ پاکستان ہاؤسنگ اسکیم نا رداٹ اُراتا تفنگ اٹ آب ءِ پک کننگ کن این ایل سی او ایف ڈبلیو او آن تعمیرات نا کاریم ء، ہلنگ انگ ءِ۔ اوپارے کہ ریورراوی پروجیکٹ لاہور اٹی اولیکو ریسہ ٹی 2 ہزار یونیورسٹی فریش گریجوایٹس ءِ اسہ سال اکن بھرتی کننگ انگ ءِ۔ اوپارے کہ حکومت نا دا گام گیج اسہ کروڑ ملازمت و 50 لکھ اُراتا فراوانی نا کنڈآ اہم ءُ پیش رفت اسے۔
