راولپنڈی۔ 19 مارچ (اے پی پی) چیئرمین جوائنٹ چیفس آف اسٹاف کمیٹی جنرل ندیم رضا عراق نا سرکاری دورہ ٹی عراقی وزیر دفاع تون اوار بڑزکو عسکری سرکڑدہ غاتا جتا جتا اوڑدہی کرے ہراٹی ہڑتوم آ فریق آک سیکورٹی، دفاعی کمک و ساڑی علاقائی حالیت آتون اوار تین پہ تینی است خواہی نا باندات آ گپ وتران کننگا۔ پاک فوج انا شعبہ تعلقات عامہ(آئی ایس پی آر) نا رداٹ عراق نا دورہ ٹی چیئرمین جوائنٹ چیفس آف اسٹاف کمیٹی جنرل ندیم رضا عراق نا وزیر دفاع جمعہ انادسادون خطاب الجبوری، عراقی چیف آف اسٹاف جنرل عبدالامیر رشید یار اللہ ال لامی و عراقی فضائیہ نا کمانڈر لیفٹیننٹ جنرل شہاب جہاد علی تون ہم جتا جتا اوڑدہی کرے۔ شرفمندآک ہڑتوم آ ملک آتا نیام اٹ ہڑتوم آ کنڈآتا فوجی انگیجمنٹس/کمکاری نا کہول و لائخی ءِ ودفنگ نا گام گیج آتے مون آ تخا و تعلقداری تے سوگو کننگ نا درشانی ءِ کریر۔ چیئرمین جوائنٹ چیفس آف اسٹاف کمیٹی جنرل ندیم رضا ڈیفنس یونیورسٹی ہائر ملٹری اسٹڈیز(ڈی یو ایف ایچ ایم ایس) نا ہم دورہ ءِ کرے و اونا ریکٹر لیفٹیننٹ جنرل سعد مشیر محسن ہاشم العلق تون اوڑدہی کرے۔ داوخت آ گپ وتران کرسا جنرل ندیم رضا پرتشدد انتہاپسندی نا چٹفنگ اٹی پاکستان نا مثبت کڑد ءِ مون آتخا و علاقائی خاص کر اوغانستان اٹی امن و سوگوی کن پاکستان نا کوشست آتیان ہم معلومدار کرے۔ داکان مست وزارت دفاع آ سرمننگ آ، چیئرمین جوائنٹ چیفس آف اسٹاف کمیٹی جنرل ندیم ءِ عراقی سلہہ بند فوج انا اسہ چاک و چوبند دستہ سلامی پیش کرے۔
