اسلام آباد۔ 19 مارچ (اے پی پی) وزیراعظم عمران خان پارینے کہ 30 سال اٹی ملک انا پیسہ غاتے دُزی کننگا۔ سندھ حکومت بنڈل آئی لینڈ جزیرہ ٹی زرکاری نا موکل تفننگ ءِ، کشاری بشخ انا شونداری کن بھلو ڈٹ و ڈول اتینہ، مشکل حالیت آتیان پیش تمانن، ہراتم حکومت ءِ سنبھالان تو ملک ءِ زرگزرانی مشکل مون تروک ئس، سنگت ملک آتا کمک اٹ ملک خواتہ مننگ آن بچا، زرگزرانی چیلنج آتا مون ءِ تورین، سیل و سوات نا بشخ شون ہلیک تو الس کن روزگار نا وارخواہی ودک، ٹیکنالوجی و تیکنیکی تعلیم بھاز اہم ءِ، ہندن ءُ ڈٹ و ڈول خلنگ اُن ہراڑآن ملکی دولت ودک۔ داخیال آتا درشانی ءِ او جمعہ نادے آیونیورسٹی آف مالاکنڈ نا پوسکن آ بلاک نا بنائی دود آن تران کرسا کرے۔ وزیراعظم پارے کہ دنیا نا مچ آ یونیورسٹی تے خنانٹ، نمل یونیورسٹی پاکستان نا آکسفورڈ یونیورسٹی اس جوڑ مریک۔ القادر یونیورسٹی نا ہم ستمبر اٹ پورو مریک، اوپارے کہ انسان اشرف المخلوقات ءِ،انسان ءِ دنیا ٹی بننگ نا مسخت ءِ پہہ مروئی مریک، انسان بیرہ تینکن زندہ مرے تو اونا ہچ ءُ مسخت اس اف۔ پیسہ خوشی تفک، خوشی ہمووخت آ ملک ہراجوان انگا کسر آ کاہک۔ وزیراعظم پارے کہ ٹیکنالوجی و تیکنیکی تعلیم بھاز اہم ءِ، ورناتے تکنیکی تعلیم ترسا روزگار تننگ مریک۔اوپارے کہ یونیورسٹی تعلیم نا راج آ بھاز بھلو اثراس تمک، خوانوک آ راج قوم تے شون ایتک۔ نن بھاز مشکل حالیت آتیان پیش تمانن۔ اوپارے کہ ہراتم حکومت ءِ سنبھالان تو ملک ءِ زرگزرانی مشکل مون تروک ئس، سنگت ملک آتا کمک اٹ زرگزرانی چیلنج آتا مون ءِ تورین، سنگت ملک آک کمک کریر و ملک خواتہ مننگ آن بچا۔ اوپرے کہ نن ہندن ءُ ڈٹ خلنگ اُن ہراڑآن ملکی دولت ودک، ملک اٹی 2 بھلو ڈیم جوڑ کننگ انگ ءِ، ملکی تاریخ اٹی اولیکو وار ہاؤسنگ نا بشخ ءِ بھاز اہمیت تسونن۔ اوپارے کہ بیرہ سیل و سوات نا بشخ پاکستان ءِ بھاز شون تننگ کیک، سیل و سوات نا بشخ شون ہلیک تو الس کن روزگار نا وارخواہی ودک، ملائیشیا 20 ارب ڈالر و ترکی 40 سیل و سوات آن کٹک۔ وزیراعظم پارے کہ ننے ٹیکنالوجی وتیکنیکی تعلیم ءِ شون تروئی ءِ، مستین اٹ داکنڈآ چکار کننگتو، اللہ تعالیٰ پاکستان ءِ ہروڑنا نعمت تسنے۔ اوپارے کہ شونداری کن ننے بیرہ پوسکن آ سوچ ءِتینا کننگ نا گرج ءِ، کشت وکشار نابشخ اٹی پوسکن ءُ سوچ اس اتسا بننگ اُن۔ صنعتی بشخ انا مون آ دننگ آن بیدس اسہ ملک اس ہم شون ہلنگ کپک۔ پاکستان اٹی ہچ ءُ گڑاسے نا کمتی اف ننے تینا سوچ ءِ بدل کروئی مریک۔ اوپارے کہ 3 ارب ڈالر نا سالانہ کنوئی آ تیل درآمد کننگک۔ زیتون نا دسنگ آن کنوئی آتیل انا پیدوار اٹی ودکی مریک۔ تعمیراتی بشخ ءِ پبی آسراتی تننگ انگ ءِ ہراڑآن روزگار نا پوسکن ءُ وارخواہی ودی مریک۔
