اسلام آباد۔ 18 مارچ (اے پی پی) صدر مملکت ڈاکٹر عارف علوی راج و حکومت آ زور شاغانے کہ او زالبول آتیکن اسہ جان جوڑ و رکھ چاگڑد ءِ پک کیر انتئے کہ اوفتا پورو و زموار کڑد اسہ شون ہلوک و شونہال پاکستان نا دوئی کننگ کن المی ءِ۔ اوداہیت ءِ ہم وومن لیڈرز ایوارڈ 2021ء نا دود آن تران کرسا پارے ہرانا بست وبند ءِ ہم نیٹ ورک کرے۔ اوپارے کہ پوسکن آ پاکستان نا جوڑ کننگ اسہ بدل مروک ءُ پاکستان اس، شون پسند پاکستان و سرسہب پاکستان نا دوئی کننگ بیرہ ہمووخت آ ممکن مننگ کیک ہراتم زالبول آک زمواری اٹ تینا پورو کڑد ءِ ادا کیرہ۔ دود اٹی خاتون اول ثمینہ علوی بنجائی وزیر ڈاکٹر فہمیدہ مرزا، شفقت محمود، سفارتکار، پنی آ شخصیت آک، شوبز، میڈیا و ایلو زند انا بشخ آتیان تعلق تخوک آ پنی آ شخصیت آک ساڑی ئسر۔ دادے زالبول آتا انسانی حق، مسن تا تعلیم، سلہہ بند فوج، پولیس سروسز، چاگڑدی رکھ، فائن آرٹس انا بشخ اٹ اوفتا کڑد ءِ امنا کننگ اٹ پاکستان آرمی نا سرجن جنرل لیفٹیننٹ جنرل نگار جوہر، نوبل انعام یافتہ ملالہ یوسفزئی،پنی آ صوفی گلوکارہ عابدہ پروین، انسانی حق انا کارندہ عائشہ چند ریگر، پشتون زالبول نا باسک تبسم عدنان، انسانی حق انا کارندہ حناجیلانی، ماہر علوم و تاریخ عائشہ جلال، میک اپ آرٹسٹ مسرت مصباح، اردن نا شہزادی ثروت الحسن، ڈی ایس پی شہزادی گلفام، ایکواڈور نا سیاستدان و زالبول آتا حق انا کارندہ ماریہ فلانڈا، ایس پی نوساگارسس ءِ ایوارڈ تننگا وخت اس کہ ملک رفیق اعوان ءِ تینا پنچ مسن تے بڑزکو تعلیم ترفنگ و سی ایس ایس نا امتحان کن کوالیفائی کننگ آ ہم ایوارڈ تننگا۔ اونا اِرامسڑ تینا باوہ ءِ ایوارڈ تسر۔ پنی آ اداکارہ بشریٰ انصاری ہم دود اٹی بشخ ہلک۔ صدر مملکت تینا تران اٹی پارے کہ زالبول آتے تعلیم و جان جوڑی نا آسراتی تننگ آن بیدس راج و حکومت ءِ مرے کہ او ہموحداسکان اوفتا رکھ ءِ پک کیر تانکہ اوفک وڑنا وڑاسے ٹی زیزارمفس، و اوفتے فریشانی تتون مون تروئی تمپ۔ اوپارے کہ زالبول آتیکن کوشست آک عشرہ غاتیان برجا ءُ۔ اوفاطمہ جناح، بیگم رانا لیاقت علی خان نا فعال کڑد انا ہم ستا ءِ کرے و ہم نیٹ ورک نا صدر سلطانہ صدیقی نا خذمت آتے خراج تحسین پیش کرے۔ صدر مملکت پارے کہ اسلام اٹی ہمووخت آ زالبول آتے حق تس ہراتم راج اٹی زالبول آتے حق تننگ نا ہچ ءُ تصور اس الوکہ۔ صدر زالبول آتے گچین آسراتی فراوان کننگ کن توار بڑز کرے وپارے کہ کم غذائیت ءِ چٹفنگک و مسن تا گچین پرورش ءِ کننگے۔ اوزالبول آتے مالی وڑاٹ واکدار کننگ آ زور شاغا۔ اوپارے کہ زالبول آتے 2 درسد مارک اپ آن کم کہول آ 50 لکھ روپئی اسکان نا وام انا حکومت نا خصوصی اسکیم آن فائدہ ہرفر۔ داکان مست صدر مملکت لیفٹیننٹ جنرل نگار جوہر ءِ ایوارڈ ہم تس۔ خاتون اول بیگم ثمینہ علوی صوفی گلوکار عابدہ پروین ءِ ایوارڈ تس و زالبول آتا حق انا بابت پاکستان اٹ بدلی اتنگ نا تینا عزم انا درشانی ءِ کرے۔ ہم نیٹ ورک نا صدر سلطانہ صدیقی ایوان صدر اٹی زالبول آتا دود انا اڈتننگ آ صدر مملکت نا منت واری ءِ ہرفے و پارے کہ داڑآن پاش مریک کہ مچ آ بنجا زالبول آتا حق انا رکھ اکن کوشست کننگ ءِ۔ اومیڈیا غا زور شاغا کہ او زالبول آتا سخت خواری و اوفتا کڑد ءِ تالان کے۔ اوپارے کہ سالانہ ایوارڈ نا مسخت زالبول آتا است بڈی ءِ کننگ ءِ۔ دود اٹی قرت العین بلوچ، عمیر جسوال و سٹرنگ نا کنڈآن سازوزیمل ہم پیش کننگا۔
