اسلام آباد۔ 18 مارچ (اے پی پی) وزیر خارجہ مخدوم شاہ محمود قریشی پارینے کہ پاکستان کویت تون تینا ہڑتوم آ کنڈآتا تعلقداری تے خاص اہمیت ایتک، پاکستان، کویت تون ہڑتوم آ کنڈآتا واپار نا کچ اٹی ودکی نا خواہندار ءِ، ہڑتوم آ ملک آتا نیام اٹ توانائی، جان جوڑی، ٹیکنالوجی، تعلیم و دفاع نا بشخ اٹی ہڑتوم آ کنڈآتا اقتصادی کمکاری ءِ مون آ دننگ نا بابت بھلو وارخواہی اس ساڑی ءِ۔ داہیت ءِ او کویت نا تینا ہم منصب ڈاکٹر احمد نصرالمحمد الصباح تون گپ وتران کرسا پارے ہرا پنچ شنبے نادے آ داڑے وزارت خارجہ ٹی ڈل اتون اوار اوڑتون اوڑدہی کرے۔ ترجمان دفترخارجہ نا رداٹ وزیر خارجہ کویتی وزیر خارجہ و اونا ڈل ءِ وزارت خارجہ غا بننگ آ بخیر اٹ پارسا پارے کہ پاکستان کویت تون تینا ہڑتوم آ کنڈآتا تعلقداری تے خاص اہمیت ایتک۔ اوپارے کہ اسہ لکھ آن زیات پاکستانی کویت اٹی رہینگ انگ ءُ ہرا کویت نا شونداری و شونہالی ٹی تینا مثبت کڑد ءِ ادا کننگ ءُ۔ نن تینا جغرافیائی سیاسی اولیت آتے جغرافیائی زرگزرانی اولیت آتیٹی بدل کرینن۔ شاہ محمود قریشی پارے کہ جنوری ٹی کویت نا نائب وزیر خارجہ پاکستان آ بس اوڑتون کثیر الجہتی بشخ آتیٹی ہڑتوم آ کںڈآتا کمکاری ءِ مون آ دننگ نا بابت جوان گپ وتران مس۔ نن پاکستان وکویت نا نیام اٹ پنچ میکو اسیجائی وزارتی کمیشن نا زوت اڈتننگ نا خواہندار اُن۔ وزیر خارجہ پارے کہ پاکستان، کویت تون ہڑتوم آ کنڈآتا واپار نا کچ اٹی ودکی نا خواہندار ءِ۔ پاکستان خلیج کمکار کونسل نا باسک آتا نیام اٹ گچین تعلقداری کن کویت نا مثبت کڑد ءِ امنا کیک۔ نن پیشن نا زرکارآتے کاروباراٹی زرکاری کن خصوصی آسراتی فراوان کننگ اُن، ہندا سوب آن کاروبار اٹی آسراتی تروک آ ملک آتا بابت پاکستان نا درجہ بندی ٹی بھلو حداسکان گچینی بسنے۔ شاہ محمود قریشی پارے کہ نن کویتی کاروباری کمپنی تے پاکستان اٹ زرکاری کن بخیراٹ پانہ۔ پاکستان و کویت نا نیام اٹ توانائی، جان جوڑی، ٹیکنالوجی، تعلیم و دفاع نا بشخ اٹی ہڑتوم آ کنڈآتا اقتصادی کمکاری نا مون آ دننگ نا بابت بھلو وارخواہی اس ساڑی ءِ۔ ننے گمان ءِ کہ کویت اسلاموفوبیا نا ودوک آ رجحان نا چٹفنگ و بین المذاہب ہم آہنگی نا مون آ دننگ کن 15 مارچ آ اسلاموفوبیا نا برخلاف جہانی دےاناوڑاٹ اڈتننگ نا سلاہ ءِ مون آ دننگ اٹ کمک کیک۔ شاہ محمود قریشی پارے کہ پاکستان مسلمان ملک آتا نیام اٹ یکجہتی ءِ سوگو کننگ کن کویت نا کوشست آتا مخ تف ءِ۔ کویتی وزیر خارجہ جم و جوش اٹ بخیر کننگ آ وزیر خارجہ نا منت واری ءِ ہرفسا پارے کہ کویت، پاکستان تون اقتصادی تعلقداری تا مون آ دننگ نا خواہندار ءِ۔ اوپارے کہ کویت نا شونداری و شونہالی ٹی، کویت اٹی رہینگوک آ پاکستانی کمیونٹی ، نا کڑد سفت نا قابل ءِ۔ کویتی وزیر خارجہ نا دورہ غان ہڑتوم آ ملک آتا نیام اٹ تعلقداری و چندی بشخ آتیٹی ودوک آ ہڑتوم آ کنڈآتا کمکاری ءِ پین سوگوی دوئی مریک۔ داکان مست کویتی وزیر خارجہ وزارت خارجہ نا سبزہ زار اٹی اسہ یات گاری نیال اس خلک۔
