اسلام آباد۔ 18 مارچ (اے پی پی) نیشنل کمانڈ اینڈ آپریشن سینٹر (این سی او سی ) کورونا ایس او پی تا گوجالنگ آ گڑتی نا درشانی ءِ کرینے۔ بنجائی وزیر ڈٹ بندی، شونداری، اصلاحات و خصوصی گام گیج اسد عمر نا کماشی ٹی پنچ شنبے نادے آ این سی او سی ٹی دیوان اس اڈ ہلک۔ این سی او سی آن جاری سرجم حوال آتا رداٹ دیوان اٹی کورونا نا بابت جان جوڑی نا چندی راہشون اصول آتیا عملدرآمد آن معلومدار کننگا ہراکہ غٹ صوبہ غاتے جاری کننگانے۔ این سی او سی ءِ معلومدار کننگاکہ دا پارت آتیا عملدرآمد کن جامع جاچ اس ہلنگ نا گرج ءِ۔ این سی او سی کورونا نا ودوک آ رجحان و مرک آتا کچ آ گڑتی ظاہر کرے۔ فورم ءِ پاننگاکہ ناجوڑی ٹی ترندی اٹ ودوک آ رجحان نظر بننگ ءِ و کورونا نا مثبت کیس آتا تناسب 7.5درسد ءِ عبور کرینے۔ کم و ود غٹ بھلا شار تیٹی مثبت کیس آتا تناسب 5 درسد ءِ عبور کرینے۔ صوبائی انتظامیہ ءِ ایس او پی تیا سختی اٹ عملدرآمد کن دمدستی گام گیج کننگ کن پاننگانے۔ الس نا کنڈآن ایس او پی تیا عملدرآمد کپننگ آ گڑتی ظاہر کننگا۔ ایس او پی تا بھلو کچ اسے آ خلاف ورزی، ماسک انا بینپننگ، راجی فاصلہ ءِ گوجالنگ تون اوار پرمان تیا عملدرآمد کپننگ نا بھلو کچ اسے آ حوال ملنگ ءِ۔ فورم شاری تیان خاست کرے کہ او اسہ وار ولدا دا دین انا برخلاف جان جوڑی نا راہشون اصول آتیا عملدرآمد نا عمدہ ءُ درور اس پیش کیر۔ فورم معلومدار کرے کہ ایس او پی تیا عملدرآمد کپننگ اٹ سخت گام گیج ہرفوئی تمنگ مریک، ہرانا نتیجہ ٹی کاروبار بند و زرگزرانی و راجی سرجزآتیا پابندی خلنگ مریک۔ دیوان اٹی دا فیصلہ ہم کننگاکہ مچ آ ملک اٹی کوویڈ۔ ویکسینیشن ہند آک یک شنبے و قومی چھٹی تیا بند مریرہ۔
