اسلام آباد۔ 17 مارچ (اے پی پی) بنجائی وزیر تعلیم و کسبی تربیت شفقت محمود پارینے کہ تعلیمی نظام اٹی اصلاحات اتنگ اُن، طالب علم مخصوص اختیاری مضمون آتون پین ودکی مضمون آتا تعلیم ہم دوئی کننگ کیک، ورناتے رٹہ سسٹم آن بچفنگ کن امتحانی نظام اٹی ہم بدلی اتنگ اُن۔ داخیال آتا درشانی ءِ او چارشنبے نادے آ ایوان صدر اٹی انٹرمیڈیٹ امتحان 2020ء ٹی پوزیشن ہلوک آ طالب علم آتیٹی ایوارڈ بشخنگ نا دود آن تران کرسا کرے۔ اوپارے کہ صدر مملکت ڈاکٹر عارف علوی نا کماشی ٹی ایوان صدر علم و ادب تہذیب و دودوربیدگ نا وت جوڑ مسنے۔ پوزیشن ہلوک آ طالب علم آک مبارکباد نا حقدار ءُ۔ اوفتا تعلیمی ترقی ایلو ورناتیکن کسر نا ڈیواءِ۔ اوپارے کہ تعلیمی نصاب و امتحانی نظام اٹ اصلاحات اٹی انٹربورڈ کمیٹی آف چیئرمینز نا اہم ءُ کڑد اسے۔ آئی بی سی سی آئی نا کڑد انا بابت کانود جوڑ کننگک۔ اوپارے کہ تدوک آ سال کورونا نا دین انا سوب آن غٹ کلاس آتا طالب علم آتے پروموٹ کننگا ولے داسہ کوشست کننگ اُن کہ اینخو سال امتحانک مریر، طالب علم آک تینا خواننگ آ چکار کیر۔ کورونا دین اٹی ودکی نا سوب آن اسکول آتے پین ہم بند کننگ مریک۔ اوپارے کہ کورونا نا دین اٹی ہراچناک اسکول آتیا کارہ اوفتا ہیل کننگ نا عمل ہم بھاز کم ءِ۔ اوپارے کہ آب اٹنگا تعلیم ءِ پک کننگ کن رٹہ سسٹم ءِ چٹفنگ نا خواہندار اُن۔ اسہ وڑنا تعلیمی نصاب اس اتنگ اُن۔ امتحانی نظام اٹی اصلاحات کننگ اُن۔ ہمووڑ امتحانی نظام مف ہرابیرہ یات داشت نا امتحان مرے۔
