اسلام آباد۔ 17 مارچ (اے پی پی) صدر مملکت ڈاکٹر عارف علوی پوسکن آ ٹیکنالوجی آن فائدہ ہرفنگ نا گرج آ زور شاغسا پارینے کہ ورناتا ذہنی جاچکاری لائخی تے کاریم اٹ اتسا ملک ءِ شونداری نا کنڈآ دننگ مریک، ملک اٹی اسہ وڑ نصاب تعلیم نا نفاذ آن راج اٹ توازن قائم مریک۔ داخیال آتا درشانی ءِ او چارشنبے نادے آ انٹرمیڈیٹ امتحانات 2020ء ٹی پوزیشن ہلوک آ طالب علم آتیٹی ایوارڈ بشخنگ نا دود آن تران کرسا کرے۔ دود اٹی بنجائی وزیر تعلیم و کسبی تربیت شفقت محمود، پارلیمانی سیکرٹری تعلیم و کسبی تربیت وجیہہ اکرم و انٹربورڈ کمیٹی نا چیئرمین (آئی بی سی سی) نا باسک آک بشخ ہلکر۔ صدر مملکت ڈاکٹر عارف علوی انٹرمیڈیٹ امتحان اٹی پوزیشن ہلوک آ طالب علم آتے مبارکبادی تس۔ اوپارے کہ دا طالب علم آک تینا خواری اٹ کورونا نا دین آن پد ہم داسرسہبی ءِ دوئی کرینو۔ اوپارے کہ طالب علم ہراعلم ءِ دوئی کیک اونا جاچ ءِ ہلنگ، سوچ و بیچار کننگ و اوڑآن نتیجہ اخذ کننگ اہمیت تخک۔ میموری علم و معلومداری نا خزانہ مریک ولے دامعلومداری تے کاریم اٹ اتنگ بھاز اہم ءِ۔اوپارے کہ بھلا سائنسدانک سوچ، جاچ و منطق اٹ سرسہبی دوئی کریر۔ ارسطو و سقراط نا زمانہ غان منطق نا تعلیم تننگک۔ اوپارے کہ مصنوعی ذہانت اٹ اہم پیش رفت مسنے۔ ذہنی نیٹ ورک انا کمک اٹ اونا جاچ ءِ ہلنگ مریک، انسان کن جسمانی مشق اتون اوار اوار ذہنی مشق ہم المی ءِ۔ اوپارے کہ داوخت آ پوسکن آ ٹیکنالوجی نا دور ءِ۔ جدت آ مبنی انفارمیشن ٹیکنالوجی آن فائدہ ہرفنگ المی ءِ۔ اوپارے کہ ملک اٹی 2 کروڑ چنااسکول آتیان پیشن ءُ داچناتے اسکول آتیا اتنگ کن نیزگار خاہوت آتے احساس پروگرام نا کمک اٹ کمک فراوان کننگ مریک۔ بنگلہ دیش کون آ ملک اٹی 98 درسدچناک پرائمری اسکول آتیا کارہ۔ اوپارے کہ انٹرمیڈیٹ نا ساڑی آ نتیجہ غاتیان پاش مریک کہ داٹی طالبات آک نمان سرسہبی دوئی کرینو۔ طالب علم آک ہم ہنداوڑ زیات آن زیات تعلیم آ چکار کیر۔ اوپارے کہ وزارت تعلیم غٹ تعلقدار فریق آتا سلابت اٹ اسہ وڑ نصاب تعلیم اس وضع کرینے، اسہ وڑ نصاب تعلیم آن توازن ودی کننگ مریک۔ صدر مملکت پارے کہ تعلیمی نظام ء، معروضی وڑاٹ مقداری جوڑ کننگانے۔ ٹیچر ٹریننگ پروگرام نا بست وبند آ چکار کننگانے۔ اوپارے کہ اصل میرات تیل اف بلکن تعلیم وذہانت ءِ، نن تینا ورناتا تعلیمی لائخی تے تالان کننگ آ چکار کین۔ منہ سال مست تیل انا کمپنیک دنیا ٹی 10 بھلا کمپنی تیٹی اوار ئسر ولے داسہ دا بھلا کمپنی تیٹی گوگل و فیس بک کون آ ذہنی و ٹیکنالوجی نا لائخی تے کاریم اٹ اتوک آ کمپنیک ءُ، منہ بندغ اواری اٹ ٹیکنالوجی نا کمک اٹ انقلاب اس اتنگ کیرہ۔ اوپارے کہ آرٹس و سائنس ہڑتوم آ بشخ آتیا چکارکننگے۔ اسہ وڑ تعلیمی نصاب آن منہ سال اٹی قوم بدل مریک۔ خواری اٹ راج شون ہلیک۔ نیزگاری نا چٹفنگ آن پوسکن آ پاکستان نا جوڑ کننگ ممکن مریک۔ نیزگاری نا چٹفنگ کن جان جوڑی و تعلیم نا بشخ آتیا چکار کننگ نا گرج ءِ۔
