اسلام آباد۔ 17 مارچ (اے پی پی) وزیراعظم عمران خان اسلام آباد سیکورٹی ڈائیلاگ نا بنائی سیشن اٹی تینا وڑنا اولیکو پالیسی ایڈوائزری پورٹل نا بناءِ کرینے۔ دا پورٹل 100 آن زیات تھنک ٹینکس، دانشور و چاہندار آتے پالیسی سازی ٹی اوار کننگ کن نیشنل سیکورٹی ڈویژن تیار کرینے۔ ایڈوائزری پورٹل نا بناءِ کرسا وزیراعظم عمران خان داگام انا ستاءِ کرینے و پارینے کہ پاکستان نا ورناک بھاز لائخ ءُ ولے اوفتا قدر ءِ کننگپک۔ اوپارے کہ پورٹل نا جوڑ کننگ سہی کنڈآ اسہ گام اسے۔ ایڈوائزری پورٹل اسہ خاص و مربوط ءُ پلیٹ فارم اسے ہرانا کمک اٹ جامع قومی سلامتی نا سرحال آ کاریم کروک آ تھنک ٹینکس و یونیورسٹیک تینا پالسی سلاہ و سوج آتے براہ راست قومی سرکڑدہ غاتسکان سرکننگ کیرہ۔ وزیراعظم نا خصوصی کمکار قومی سلامتی ڈویژن و اسٹریٹجک پالیسی پلاننگ ڈاکٹر معید یوسف پارے کہ پورٹل نا جوڑ کننگ نا مسخت دانشور و پالیسی ساز آتا نیام اٹ مروک آ پرخ ءِ چٹفنگ ءِ۔ اسلام آباد سیکورٹی ڈائیلاگ اِرادے ئی جہانی کانفرنس اسے۔ چارشنبے نادے آ اسلام آباد سیکورٹی ڈائیلاگ نا سیشن تیان بیدس پنچ شنبے نادے آ مسہ سیشن مریک۔ اینو پنچ شنبے آ ارٹ میکو دے انا بنائی نشست آن چیف آف آرمی اسٹاف جنرل قمرجاوید باجوہ تران کیک۔ اسلام آباد سیکورٹی ڈائیلاگ نا گیشتر ورچوئل دیوان اٹی ملکی و علاقائی چاہندار و میڈیا و ایلو کمامدارآک بشخ ہلنگ ءُ۔ اسلام آباد سیکورٹی ڈائیلاگ نا بنداوی سرحال جامع سیکورٹی فریم ورک اس مرتب کننگ ءِ ہراڑآن ملک جہانی و علاقائی شونداری نا وت مننگ کن تینا مخفی لائخی تیان فائدہ ہرفنگ کیک۔ قومی سلامتی ڈویژن اسلام آباد سیکورٹی ڈائیلاگ ءِ دنیا نا پنی آ سیکورٹی ڈائیلاگ نا ہم پلو سالانہ ایونٹ جوڑ کننگ نا خواہندار ءِ۔
