صدر مملکت ڈاکٹر عارف علوی تون بنگلہ دیش اٹی پاکستانی ہائی کمشنر نا اوڑدہی

اسلام آباد۔ 16 مارچ (اے پی پی) صدر مملکت ڈاکٹر عارف علوی بنگلہ دیش تون واپاری و دودوربیدگی تعلقداری تے پین سوگو کننگ آ زور شاغسا پارینے کہ اسیجائی فائدہ کن واپاری تعلقداری، کاروباری کمکاری و السی رابطہ غاتا ودفنگ نا گرج ءِ۔ داخیال آتا درشانی ءِ او سے شنبے نادے آ بنگلہ دیش اٹی پاکستانی ہائی کمشنر عمران احمد صدیقی تون اوڑدہی ٹی کرے۔ صدر مملکت پارے کہ بنگلہ دیش تون واپاری و دودوربیدگی تعلقداری تے پین گچین کننگ نا گرج ءِ، پاکستان بنگلہ دیش تون تعلقداری تا بھاز قدر ءِ کیک۔ اوپارے کہ پاکستان سیکرٹری خارجہ نا کہول آ سیاسی سلابت و اسیجائی اقتصادی کمیشن آن کمکاری ءِ ودفنگ خواہک۔ پاکستانی ہائی کمشنر بنگلہ دیش تون ہڑتوم آ کنڈآتا تعلقداری تا گچین کننگ کن کاریم کے، اوپارے کہ مشترکہ مفاد کن واپاری تعلقداری، کاروباری کمکاری و السی رابطہ غاتا ودفنگ نا گرج ءِ، ہڑتوم آ کنڈآتا دودوربیدگی وسیاسی ہن و بر تون گوازی تا پڑ اٹ کمکاری ءِ ودفنگ نا ہم گرج ءِ۔