اسلام آباد۔ 15 مارچ (اے پی پی) پاکستان پارینے کہ خارتس تقریر، کم علمی و جعلی خبر تا سوب آن چلینگوک آ اسلاموفوبیا نا لعنت، مچ آ دنیاٹی مسلم اقلیت آتیکن گمان آن پیشن خواری تا سوب مننگ ءِ۔ وزیراعظم عمران خان ودوک آ منظم اسلاموفوبیا نا سنگین نتیجہ غاتا بارواٹ شعور بیدار کننگ و بین المذاہب ہم آہنگی ءِ مون آ دننگ کن کوشست کننگ ءِ۔ ترجمان دفترخارجہ دوشنبے نادے آ او آئی سی نا کنڈآن اڈتروک آ اسلاموفوبیا تون مون تننگ نا جہانی دے انا وخت آ پارینے کہ وزیراعظم عمران خان نا وژن نا رداٹ پاکستان 15 مارچ آ نیامی ٹی اڈ ہلوک آ او آئی سی نا وزیر خارجہ غاتا کونسل نا 47 می دیوان اٹی اسلاموفوبیا تون مون تننگ نا جہانی دے ءِ اڈتننگ ناقرارداد پیش کریسس۔ او آئی سی جہانی کہول آ دادے ءِ اڈتننگ کن جہانی برادری تون اواری اٹ کاریم کننگ ءِ۔ دابابت او آئی سی نا امنائی مخ تفی مچ آ دنیا نا ارب آ مسلمان تا جوزہ غاتا ڈیک ءِ۔ پاکستان، اینو او آئی سی باسک آتون اواری اٹ اولیکو وار، اسلاموفوبیا تون مون تننگ نا جہانی دے ءِ اڈتننگ ءِ، داوخت آ، او آئی سی پڑک 17 مارچ آ نیویارک اٹی اسہ بڑزکو کہولی دود اس اڈ ایتک۔ دفترخارجہ نا پاننگ ءِ کہ اسلاموفوبیا چندی دروشم اختیار کرینے ہرافتے ٹی منفی پروفائلنگ، امتیازی کانود، باحجاب زالبول آتیا جلہو، مینارتیا پابندی، منفی پروپیگنڈا، راستیکو کنڈانا جماعت آتا منشور، اسلامی علامت آتا رزاک اٹ پِرغ وبٹ مقدس ہند آتا بے حرمتی، و اسلام ءِ دہشت گردی تون گنڈنگ نا کوشست آک اوار ءُ۔ داوڑنا حرکت اسہ پرامن دنیا و ہم آہنگی کن ننا اسیجائی است خواہی تے زہمی کیک۔ دفترخارجہ نا پاننگ ءِ کہ پاکستان مدام دودوربیدگ و تہذیب آتا نیام اٹ پول انا کڑد ادا کننگ کن جہانی کوشست آتا مخ تفی ءِ کرینے۔ دادے ءِ اڈتننگ نا کمک اٹ، نن اسلام و اسلامی پرمان تا بارواٹ گچین افہام و تفہیم ودی کننگ خوانہ۔ نن پرامن بقائے باہمی تون اوار اوار بین المذہبی و دودوربیدگی ہم آہنگی نا قدر ءِ مون آ دننگ کن سنبرینگوک اُن۔
