اسلام آباد۔ 15 مارچ (اے پی پی) بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی کابینہ کمیٹی توانائی(سی سی ای ای) نا دیوان دوشنبے نادے آ اسلام آباد اٹی اڈ ہلک۔ توانائی نابابت کابینہ کمیٹی جامع سرکلرڈیبٹ مینجمنٹ پلان(سی ڈی ایم پی) 2021ء نا خلاصہ غا گپ وتران کرے ہراٹی مالی سال2020-21آن مالی سال 2022-23اسکان نا مسہ سال انا مد انا احاطہ ءِ کننگانے و داویل ءِ ایسر کننگ نا وڑوڈول و گام گیج آتا وضاحت کننگانے و دانا مون ءِ توننگ کن اسہ ایکشن پلان اسے نا سلاہ پیش کننگا۔ کابینہ کمیٹی سرکلر ڈیبیٹ نا گچین بست وبند ءِ پک کننگ کن پاور ڈویژن نا پیش کروک سمری نا منظوری ءِ تس۔ کمیٹی حکومت نا کنڈآن منظور مروک رینیوایبل توانائی پالیسی آ عملدرآمد کن باخبر مننگ کن چندی ایکشن پلان آ ہم گپ وتران کرے۔ کمیٹی وزارت توانائی ءِ قابل تجدید توانائی ڈٹ آتا نیلامی کن کارروائی ترند کننگ نا پارت کرے تانکہ قابل تجدید توانائی وسیلہ نا زیات آن زیات کاریم اٹ اتنگ ءِ پک کننگ مرے۔ دیوان اٹی بنجائی وزیر توانائی عمر ایوب خان ، وزیراعظم نا سلاہکار خزانہ عبدالحفیظ شیخ ، ایس اے پی ایم ندیم بابر، وزیراعظم نا خصوصی کمکار پاور ریونیو و چندی وزارت/ڈویژن آتا عہدیدارآک بشخ ہلکر۔
