اسلام آباد۔ 15 مارچ (اے پی پی) اسپیکر قومی اسمبلی اسد قیصر تون وزیراعظم نا سلاہکار پارلیمانی امور ڈاکٹر بابر اعوان دوشنبے نادے آ اوڑدہی کرے ہراٹی اہم کانود سازی نا عمل ءِ ترند کننگ تون اوار آئینی و گچین کاری اصلاحات آ کمیٹی اس ٹہیفنگ آ امنا کننگا۔ قومی اسمبلی سیکرٹریٹ نا رداٹ کمیٹی نا کماشی ءِ اسپیکر قومی اسمبلی اسد قیصر کیک۔ کمیٹی گلگت بلتستان عبوری صوبہ نا بابت آئینی و کانودی پلو آتا ہم جاچ ءِ ہلیک۔ کمیٹی ٹی اپوزیشن و حکومت ءِ بریبر نمائندگی تننگک۔ کمیٹی اپوزیشن نا گڑتی تا ہم سرجم جاچ ءِ ہلسا امنائی لائحہ عمل اس مرتب کیک۔ کمیٹی الیکشن اصلاحات نا پدسلوک بل انا ہم اول سرآن جاچ ءِ ہلیک۔ کمیٹی سینیٹ الیکشن نا بابت آئین اٹ ترمیم نا بابت اپوزیشن جماعت آتون سلابت کیک۔ اسپیکر قومی اسمبلی ناپاننگ ئس کہ سینیٹ گچین کاری تیا مروک آ سودج آتا تدارک ءِ کننگ المی ءِ۔ گچین کاری اصلاحات وخت انا اہم گرج ءِ۔ کانودسازی نا کمک اٹ اہم کانودی باندات آتیٹی اصلاحات اتنگ مریک۔ حکومت و اپوزیشن کانودسازی نا کمک اٹ السی اہمیت نا اہم باندات آتے جوانی اٹ ایسر کیر۔ سینیٹ گچین کاری تیٹی اصلاحات مفننگ نا سوب تماشا مرسا کرے۔ ننے مستین ءِ است آن درسا آخبت نا بارواٹ سجفوئی مریک۔
