پاکستان اٹی کاریم کروک آ درملکی کمپنی تا کنڈآن کٹیا تا گدریفنگ اسہ ارب ڈالرآن گدرینگانے، اسٹیٹ بیک

اسلام آباد۔ 15 مارچ (اے پی پی) پاکستان اٹی کاریم کروک آ درملکی کمپنی تا کنڈآن اینخو مالی سال انا بنائی 7 تُواٹی کٹیا تا تینا ملک آتے گدریفنگ اسہ ارب ڈالر آن گدرینگا۔ اسٹیٹ بینک آف پاکستان (ایس بی پی) نا رپورٹ نا رداٹ تدوک آ مالی سال انا مقابلہ ٹی اینخو مالی سال اٹی جولائی آن جنوری ٹی کٹیا تا گدریفنگ اٹ 8 درسد ودکی مسنے۔ داوخت آ درملکی کمپنی تا کنڈآن 1.025ارب ڈالر پیشن نا ملک آ گدریفنگانے وخت اس کہ تدوک آ مالی سال اٹی جولائی آن جنوری ٹی 947ملین ڈالر نا کٹیا پین پین پیشن نا ملک آ گدریفنگاسس۔ ہنداوڑ کٹیا تا پیشن نا ملک گدریفنگ اٹ 78 ملین ڈالر نا ودکی ریکارڈ کننگانے۔ ایس بی پی نا رپورٹ نا رداٹ اینخو مالی سال اٹی برطانوی زرکارآک غٹ آن زیات یعنی 362ملین ڈالر پیشن نا ملک گدریفنگانے وخت اس کہ ارٹ میکو نمبر آ امریکی زرکارآتا کنڈآن غٹ آن زیات 195 ملین ڈالر گدریفنگانے۔ داکان بیدس اینخو مالی سال انا بنائی 7 تُو اٹی فوڈ سیکٹر نا کنڈآن 220 ملین ڈالر، مالیت نا بشخ آن 136ملین ڈالر، مواصلات نا بشخ آن 119 ملین ڈالر و ٹرانسپورٹ سروسز نا بشخ انا کنڈآن 106 ملین ڈالر نا کٹیا پیشن نا ملک آ گدریفنگا۔ رپورٹ نا رداٹ جنوری 2021ء ٹی درملکی کمپنی تا کنڈآن جم وڑاٹ 133.3ملین ڈالر ایلو ملک آتے گدریفنگانے ہرافتے ٹی براہ راست درملکی زرکاری (ایف ڈی آئی) آن دوئی مروک آ 121.5 ڈالر و پورٹ فولیو زرکاری آن دوئی مروک آ 12 ملین ڈالر نا کٹیاک پین پین اوار ءُ۔