حوال:۔ سعادت خان محمد حسنی
چین۔پاکستان اقتصادی راہداری (سی پیک) ڈٹ آ جوانی اٹ پیش رفت نا سوب آن پاکستان بروک آ دے تیٹی بھلو کچ اسے آ زرگزرانی سرجزآتا اومیت تخک۔ چین نا حکومت نا شاندار بیلٹ اینڈ روڈ انیشی ایٹو(بی آئی آئی) نا سوب آن پاکستان علاقائی اقتصادی سرجزآتیٹی اہم ءُ کڑدہ اس جوڑ مسنے۔ دا ڈٹ آن نئے بیرہ واپار نا کمک اٹ ارب آ ڈالر نا کٹیا مریک بلکن انفراسٹرکچر نا شونداری، بجلی نا پیدوار، اتنگ و دننگ، ریلوائی، کشت وکشار، سائنس و ٹیکنالوجی و سیل و سوات نا بشخ آتیٹی ڈٹ آتیان بیدس ہزار آ ہندی بندغ آتے روزگار نا وارخواہی دُوبریک۔
سی پیک نا رداٹ پاکستان و چین نا اسیجائی ڈٹ انا کمک اٹ مچ آ ملک اٹ خصوصی اقتصادی زون تا جوڑ کننگ اہم ءُ حیثیت اس تخک۔ دا ڈٹ انا اہمیتءِ مون آ تخسا کیہی چندی ملک آک ہم داٹی زرکاری کن است خواہی نا درشانی ءِ کرینو۔
چین پاکستان اقتصادی راہداری (سی پیک) نا ارٹ میکو ریسہ نا بناء غان پد اقتصادی سرگرمی زور و شور اٹ برجاءِ ہرا زیات تر اقتصادی کمکاری آ تالان ءِ۔
دُن تو خصوصی اقتصادی زونک چین پاکستان اقتصادی راہداری ڈٹ انا رداٹ تفنگ انگ ءُ ہرافتا بنداوی مسخت چینی صنعت و زرکاری ءِ راغب کننگ ءِ ولے ہڑتوم آ ملک آک مہالو آن میگا پروجیکٹ اٹی مسٹ میکو کڑدہ نا بشخ ہلنگ نا سلہ خلکونو۔
سعودی عرب، قطر، ایران، دے ٹک نیامی نا ملک آک و گڑاس یورپی ملک آتون اوار کیہی ملک آک صنعتی زون تیٹی خاص وڑاٹ زرکاری کننگ اٹ است خواہی ظاہر کرینو۔
سی پیک اٹ مسٹ میکو کڑدہ نا اوار مننگ غٹ کڑدہ غاتیکن اسہ وڑ اٹ فائدہ ئی ءِ انتئے کہ داڑآن درملکی کمپنی تے حکومت پاکستان نا پیش کروک کٹیائی آسراتی تیان فائدہ ہرفنگ تون اوار اوار تینا کاروبار ءِ مون آ دننگ اٹ کمک رسینگک و داڑتون پاکستان ءِ گمانی جہانی منڈی ٹی تینا برآمد آتے ودفنگ اٹ کمک رسینگک۔ چینی کمامدارآک ہم سی پیک و خاص وڑاٹ اقتصادی زون تیٹی گیشتر بشخ ہلنگ نا اہمیت ءِ امنا کرینو۔
گوادر فری زون آن بیدس سی پیک نا رداٹ کل 9 خصوصی اقتصادی زون نا ڈٹ بندی ءِ کننگانے ہرافتے ٹی سندھ، پنجاب و خیبرپختونخوا نا چار اولیتی زون بشمول دھابیجی، علامہ اقبال انڈسٹریل سٹی، رشک اکنامک زون و بلوچستان اٹی بوستان اکنامک زون اوار ءُ۔
سی پیک نا مسخت زرگزرانی و واپاری پڑتیا پاکستان نا جہانی حیثیت ءِ سوگو کننگ آن بیدس ملک ءِ دنیا نا بڑزکو زرگزران تیٹی اوار کننگ ءِ۔ دامسخت نا دوئی کننگ کن بنجائی و صوبائی ہڑتوم آ سرکاری محکمہ غاک وزیراعظم عمران خان نا متحرک کماشی ٹی اختہ ءُ۔
60بلین ڈالر نا سی پیک پروجیکٹ نا رداٹ 53 ارب ڈالر مالیت نا چندی ڈٹ آتا پیدواری ءِ کننگانے و راہداری نا رداٹ 25 ارب ڈالر مالیت نا 17 ڈٹ پورو مسنووخت ا س کہ 19 ڈٹ تفنگ انگ اٹی ءُ و تاریخی ایم ایل ون ریلوائی پروجیکٹ تون اوار پین 28 ڈٹ ڈٹ بندی و منظوری نا جتا ریسہ غاتیٹی ءُ۔
داڈٹ آتیٹی مسہ۔ چوتھائی زر چینی زرکاری آ تالان ءِ ہرا چینی وام تا جال انا جہانی پروپیگنڈانا نفی ءِ کیک۔
پارلیمانی سیکرٹری ڈٹ بندی شونداری و اصلاحات و خصوصی گام گیج کنول شوزب اے پی پی ءِ پارے کہ ملک انا چندی علاقہ غاتیٹی سی پیک نا رداٹ نہہ آن چار اکنامک زون آ کاریم برجاءِ۔
اوپارے کہ دا زون تیٹی بناکروک آ خصوصی زرگزرانی سرجزآک ملک اٹ زرگزران نا جم حالیت آتے سوگو کننگ آن بیدس لکھ آ بلاواسطہ و بالواسطہ روزگار نا وارخواہی ٹی ودکی کننگ اٹ کمکار مریک۔ اوپارے کہ ننا چینی ہم منصب صنعتی شونداری ٹی ننا بھاز کمک ءِ کننگ ءِ ولے ہندی مخلوق ہم سی پیک نا رداٹ ملک انا شونداری کن ہم کوپہ کاریم کننگ ءُ۔
پارلیمانی سیکرٹری سی پیک نا رداٹ پنچ بشخ آتیٹی پیدواری کرے ہراڑآن مخلوق نا زند آ براہ راست یا بالواسطہ مثبت اثرتمک ہرافتے ٹی رابطہ، توانائی نا ڈٹ، وزیراعظم نا ساف ستھرا و سوز ڈٹ، راجی و اقتصادی شونداری اوار ءِ۔
اوپارے کہ مسٹ میکو کڑدہ نا سی پیک اٹ اوار مننگ نا خیرمقدم ءِ کرسا پارے کہ اگہ سعودی عرب، امریکہ و ایلو دیکی ملک آک خصوصی اقتصادی زون تیٹی زرکاری کیرہ تو دا مچ آ ڈیہہ و داکان مون انا علاقہ غاتیٹی گیم چینجر اس جوڑ مریک۔ اوپارے کہ قطر ءِ ہم بٹنگ انگانے و دا ملک مرغن ءُ کسر اس اختیار کننگ نا جاگہ غا چندی ملک آتے مائع قدرتی گیس انا فراوانی کن سی پیک نا گونڈ ءُ کسر اس انتخاب کننگ کیک۔
چیئرمین فیڈریشن آف پاکستان چیمبر آف کامرس اینڈ انڈسٹری، کیپیٹل آفس قربان علی پارے کہ سی پیک پاکستان کن گیم چینجر اسے۔ ایلو ملک آتا شریداری اٹ ایس ای زیز اٹ گیشتر سرگرمی آن دا زون تیٹی زرگزرانی سرگرمی ءِ پین مون آ دننگک۔
اوپارے کہ اگہ سعودی عرب، امریکہ و ایلو دیکی ملک آتا کمپنیک پاکستان نا خصوصی اقتصادی زون اٹی زرکاری کیرہ تو سی پیک ءِ پین سوگوی رسینگک و داغٹ اکن اسہ وڑ فائدہ ئی جوڑ مریک۔
اوپارے یکہ گوادر بندرگاہ شار جہانی بندرگاہ شار کون آ دبئی ءِ پدی ہلنگ نا لائخی تخک انتئے کہ انتئے کہ اودے اسہ کنڈآ ایران، ترکی و دے ٹک نیامی ملک آتون اوار مچ آ ڈیہہ وایلو کنڈآ اوغانستان، چین، نیامی ایشیائی ریاست و داکان بیدس یورپ تون گنڈنگ مریک۔ اومستی پارے کہ سی پیک ءِ واخان راہداری تون ہم گنڈنگ مریک ہرا 76 کلومیٹر مریس سیم ءِ و نئے بیرہ اوغانستان بلکن نیامی ایشیائی ریاست آتسکان ہم رسینگ کن راہداری ءِ۔ نیامی ایشیائی ریاست آتسکان سرمننگ کن ننے دا گونڈ انگا کسر آن جوان وڑاٹ فائدہ ہرفنگ نا گرج ءِ۔
اومستی پارے کہ حکومت نا کنڈآن سی پیک نا رداٹ خصوصی زون تیٹی زرکاری کروک آ صنعت کار آتیکن پیش کروک آ آسراتیک بھاز کٹیائی ءُ و داسہ نئے بیرہ ہندی بلکن درملکی صنعت کار آک ہم علامہ اقبال انڈسٹریل پارک فیصل آباد، رشکئی و ایلو اقتصادی زون تیٹی زرکاری کننگ آ رضامندی نا درشانی ءِ کننگ ءُ۔
اوپارے کہ سی پیک نا گیٹ وے مننگ نا ناطہ گلگت بلتستان(جی بی) بھاز اہمیت تخک و صنعتی شونداری و مخلوق نا راجی آسراتی کن دا ڈیہہ آ چکار کننگ نا گرج ءِ۔ حکومت جی پی ٹی مقفند دازون اکن ڈغار جتا کرینے و داجاگہ غا اکنامک زون ءِ اولیتی وڑاٹ شون تننگ نا گرج ءِ کہ دا علاقہ نا مخلوق ہم ملک اٹ جم شونداری عمل آن فائدہ ہرفنگ کیر۔
دُن تو سی پیک نا کمک اٹ چندی ڈٹ آتیا کاریم برجاءِ، داسہ وخت بسنے کہ شونداری کاریم تے پین ترند کننگے تانکہ الس زوت آن زوت دا میگا پروجیکٹ نا بھرم تیان فائدہ ہرفنگ کے۔
کوویڈ۔ 19 نا سوب آن نہاد آتیٹی ودکی و جہانی زرگزرانی کسادبازاری نا رداٹ ہم سی پیک ڈٹ آتا اہمیت اٹ کیہیہموخس پین ودکی مسنے۔ سی پیک ڈٹ آتیا ترندی اٹ عملدرآمد آن گڑاتا دروشم ءِ بدل کیک و اڑزآن گڑا و روزگار نا فراوانی نا لحاظ اٹ الس نا زند اٹ آسراتی و نمان بدلی اس بریک۔
