اسلام آباد۔ 12 مارچ (اے پی پی) حکومتی سیوت نا اومیتدار سینیٹر صادق سنجرانی 48 وونٹ ہلسا چیئرمین سینیٹ گچین مسنے وخت اس کہ اونا مدمقابل اومیتدار سینیٹر سید یوسف رضاگیلانی 42 وونٹ ہلک وخت اس کہ 8 وونٹ مسترد مسر۔ جمعہ نادے آ بڑزکو ایوان نا دیوان اٹی سینیٹ نا 100 باسک آتیان 98 باسک تینا حق سلاہ تننگ ءِ کاریم اٹ ایسُر۔ اسہ باسک اسحاق ڈار نا نوٹیفکیشن الیکشن کمیشن نا کنڈآن معطل ءِ وخت اس کہ جماعت اسلامی نا سینیٹر مشتاق احمد خان غیرحاضر ئس۔ سینیٹ کن پولنگ نا عمل سہ بجہ غا پریزائیڈنگ آفیسر سینیٹر سید مظفرحسین شاہ نا کماشی ٹی بناکرے۔ سید مظفر حسین شاہ پولنگ نا بناء آن مست پولنگ نا وڑوڈول و قاعدہ و ضابطہ نا بابت باسک آتے معلومدار کرے۔ سہ بجہ ءُ 18 منٹ آ سینیٹر مولانا عبدالغفور حیدری تینا وونٹ ءِ بٹے ہرا ڈپٹی چیئرمین سینیٹ کن اپوزیشن نا پندار اومیتدار ءِ۔ چیئرمین سینیٹ نا گچین کاری کن ووٹنگ نا عمل پرامن وڑاٹ بیگہ نا 4 بجہ ءُ 40 منٹ آ پورو مس۔ گڈیکو وونٹ ءِ پریزائیڈنگ آفیسر سیینیٹر سید مظفرحسین شاہ شاغا۔ سینیٹر مشتاق احمد خان نا غیرحاضری نا سوب پریزائیڈنگ آفیسر بیگہ نا پنچ بجہ اسکان پولنگ نا وخت پورو مننگ نا انتظار ءِ کرے و اوکان پد اسہ منٹ اسکان سینیٹر مشتاق احمد کن گھنٹی خلنگا ولے اونا ایوان اٹ بفننگ آ وونٹ آتا حساب کننگ نا بناءِ کننگا۔ گچین کاری عمل اٹی سینیٹر فاروق حامد نائیک سینیٹر سید یوسف رضاگیلانی وخت اس کہ سینیٹر محسن عزیز سینیٹر صادق سنجرانی نا پولنگ ایجنٹ نا فرض ءِ سرتسر۔ 8 وونٹ مسترد کننگا۔ 7 بیلٹ پیپرز آ سید یوسف رضاگیلانی نا پن انا زی آ خلنگاسس وخت اس کہ اسہ ووٹراس ہڑتوم آ اومیتدار آتا خانہ ٹی مہر خلک ہرانا سوب آن دا وونٹ ءِ ہم مسترد کننگا۔ اپوزیشن نا سینیٹر فاروق حامد نائیک سید یوسف رضاگیلانی نا پن انا زی آ خلوک آ وونٹ ءِ مسترد کننگ آ اعتراض کرے وپارے کہ اونا پن انا زی آ مہر ءِ خلنگانے ہنداخاطرآن داوونٹ آتے مسترد کننگ مفک ہراڑا سینیٹر صادق سنجرانی نا پولنگ ایجنٹ سینیٹر محسن عزیز پارے کہ پارت نامہ ٹی پیدوار وڑاٹ نوشتہ ءِ کہ اومیتدار نا پن انا مون والا خانہ ٹی ہی مہر خلنگ مریک ہنداخاطرآن یوسف رضاگیلانی نا پن انا زی آ ہرا مہر ءِ خلنگانے ہنداخاطرداوونٹ مسترد بایدے مرے ہراڑا پریزائیڈنگ آفیسر تینا رولنگ ترساپارے کہ او ہڑتوم آ اومیتدار آتا پولنگ ایجنٹ آتا دلیل آتے بنگونے و اودانتیجہ غا سرمسنے کہ سید یوسف رضاگیلانی نا پن انا زی آ ہرابیلٹ پیپر تیا مہر خلنگانے او ہفت وونٹ آتے مسترد کننگک و سینیٹر صادق سنجرانی ءِ سرسہب گوندنگک۔ صادق سنجرانی 48 و اونا مدمقابل اپوزیشن نا اومیتدار سید یوسف رضاگیلانی 42 وونٹ ہلکونے۔ نتیجہ نا پڑو آن پد حکومتی باسک آک ڈیسک آتے خلکر و ایوان اٹ نعرہ غاتا توار پنا۔
