اسلام آباد۔ 12 مارچ (اے پی پی) وزیراعظم عمران خان پارینے کہ مستین نا لاپرواہی تا نتیجہ ٹی اینو الس خوار ءِ ، بجلی نا کبین ءُ ڈٹ خلنگا، فراوانی و تقسیم نا نسخان تا مون ءِ توننگ و سسٹم نا خرابی تے سہی کننگ نا پلو ءِ گوجالنگ انگ ءِ ہرانا بھاریم ءِ الس ءِ سگوئی تمنگ ءِ۔ داخیال آتا درشانی ءِ او جمعہ نادے آ بجلی نا نہاد و خاص کر بجلی نا بشخ اٹی گردشی وام تیٹی کمتی اتنگ نا بابت دیوان نا کماشی ءِ کرسا کرے۔ دیوان اٹی بنجائی وزیر مخدوم خسروبختیار، ڈاکٹر عبدالحفیظ شیخ ، محمد حماد اظہر، سید فخرامام، عمرایوب، اسد عمر، خصوصی کمکار ندیم بابر، ڈاکٹر وقار مسعود ، تابش گوہر، مسکوہی وزیر خزانہ شوکت ترین، بنجائی سیکرٹری صاحب آک و ایلو سینئر آفیسر آک بشخ ہلکر۔ وزیراعظم ءِ بجلی نا ساڑی آ نہاد، گردشی وام و داوام تیٹی کمتی اتنگ نا بابت سلاہ ئی حکمت عملی آ حوال تننگا۔ دیوان ءِ پاننگاکہ ساڑی حکومت نا کوشست آتیٹی ہراڑے تکنیکی و غیر تیکنیکی نسخان آتیٹی کمتی نا رجحان مون آ بسنے ہموڑے بجلی نا بل آتا وصولی تیٹی ہم گچینی بسنے۔ دیوان ءِ پاننگاکہ ٹرانسمیشن اینڈ ڈسٹری بیوشن لاسز(ترسیل و تقسیم) اٹ پین کمتی اتنگ کن حکمت عملی اس تیار کننگانے پبی کوشست ءِ کہ ترسیل و تقسیم نا مد اٹ مروک آ اصل نسخان و نیپرا نا کنڈآن منظور مروک کچ انا نیام اٹ پرخ ءِ کم انگا کہول آ اتنگ مرے۔ وزیراعظم ءِ پاننگاکہ نسخان تا مون ءِ توننگ و وصولی تے گچین کننگ نا بابت بروک آ اِراسال اٹی تخوک آ ٹارگٹ اٹ کم و ود سوا سہ سد ارب روپئی نا گچینی بریک ہرانا فائدہ صارف آتے رسینگک۔ وزیراعظم دیوان آن تران کرسا پارے کہ مسکوہی حکومت آتا کنڈآن ہراڑے اسہ کنڈآ بجلی نا کبین ڈٹ خلنگا ہموڑے ترسیل و تقسیم نا نسخان تا مون ءِ توننگ و سسٹم نا خرابی تے سہی کننگ نا پلو ءِ گوجالگنسا کننگا ہرانا بھاریم ءِ الس ءِ سگوئی تمنگ ءِ۔ وزیراعظم پارے کہ مستین نا لاپرواہی تا نتیجہ ٹی اینو الس خوارءِ۔ وزیراعظم بجلی نا بشخ اٹ گچینی نا بابت سلاہ کروک حکمت عملی نا بابت پارت کرے کہ ہدف آتا دوئی کننگ نا غٹ تعلقدار وزارت آتا زمواری تے پیدوار کننگے تانکہ گام گیج آتیا عملدرآمد و ہدف آتا وخت آ پوروی ءِ پک کننگ مرے۔
