کراچی۔ 12 مارچ (اے پی پی) صدر مملکت ڈاکٹر عارف علوی پارینے کہ راج انا غٹ تپہ غاتے قومی دنگ اٹ اوار کننگ آن بیدس شونداری مننگ کپک، پوسکن آ چین خیرانا کاریم تیٹی زیات آن زیات بشخ ہلنگ تون اوار اوار وڈی خوری نا برخلاف بش مریر، ایمان، سیوت و تنظیم نا اصول ننکن کسر نا ڈیواءِ، چناک تینا و چاگڑد نا سفائی نا خاص خیال ءِ تخر۔ داخیال آتا درشانی ءِ او جمعہ نادے آ پاکستان اسکاؤٹس سندھ انا کنڈآن دود آن تران کرسا کرے۔ صدر مملکت پارے کہ اسکاؤٹس اسہ ہیلکاری تحریک اسے ہرا تنظیم، نظم و نسق و خذمت نا تربیت فراوان کیک۔ اوداوخت آ اسکاؤٹس اٹ تینا شمولیت و داتحریک تون وابستہ تینا یات آتا بارواٹ بشخ ہلوک آتے پارے۔ صدر مملکت چناتے سفائی ستھرائی و جان جوڑ چاگڑد نا اہمیت آن معلومدار کننگ نا گرج آ زور شاغا۔ اوچناتے تینا و چاگڑد نا سفائی نا پنت و شون کرسا پارے کہ چاگڑد ءِ ساف ستھرا تخنگ کن درخت آتا بھاز اہمیت ءِ، وزیراعظم عمران خان مچ آملک اٹی 10 ارب درخت خلنگ نا پروگرام نا بناءِ کرینے، چناک تینٹ ہم نیال خلیر و تینا عزیز و قریب آتے ہم نیال خلنگ کن رضامند کیر۔ اوپارے کہ ایمان نا نیمہ سفائی ءِ، داڑآ عمل کرسا بھاز انگا ناجوڑی تیان بچنگ مریک۔ صدر مملکت سیوت نا گرج آ زور شاغسا پارے کہ داٹی غٹ انا آسودہی ءِ، اواری اٹ کاریم کننگ نا بھازاہمیت ءِ و اسکاؤٹس نا تحریک اٹ اونا تربیت نا بست وبند کننگک۔ صدر مملکت پارے کہ پاکستان نا مخلوق نا اسہ بھلا خوبی دادے کہ او خیرانا کاریم تیٹی زیات آن زیات بشخ ہلیرہ چناتیٹی داجوزہ ءِ مون آ دننگ نا گرج ءِ، ہنداوڑ سوگو ءُ قوم اس جوڑ مریک۔ اوپارے کہ تعلیم نا بنداو آ بندغ آک و ملک شون ہلیک، ہنداخاطرآن المی ءِ کہ چناتا آب اٹ تعلیم تون اوار اوار تربیت نا بست و بند ہم کننگے۔ اوپارے کہ وڈی خوری زیار انا حیثیت تخک، ہراملک آتے بھس کیک، ہروڑکوشست کین مال جوڑ کننگ نا لالچ آن مُر مرین، پاکستان ءِ وڈی خوری آن بھاز نسخان رسینگانے۔ ننا پوسکن آ چین ءِ دانا سمامرے کہ او تینا ملک ءِ وڈی خوری نا لعنت آن پاک کننگ کیرہ۔ صدر مملکت پارے کہ ننے معذور بندغ آتے داقابل کروئی ءِ کہ او علم و کسب نا بنداو آ تینا نت تیا سلنگ کیر۔ اوپارے کہ خصوصی بندغ آتا بابت راج ءِ احساس کروئی مرے کہ اوفتیا ملنڈ خلنگپ بلکن اوفتا عزت نفس و شرف ءِ ملحوظ خاطر تخنگے، اوفتا است بڈی ءِ کننگے تانکہ او راج انا کاریمی ءُ شاری جوڑ مننگ کیر۔ صدر مملکت پارے کہ ہراقومک محروم تپہ غاتا احساس ءِ کرسا اوفتا راجی آسراتی آ چکارکریر و اوفتے قومی دنگ اٹ اوار کریر، اوفک شونداری نا مزل آ سرمسنو، کنے اومیت ءِ کہ اگہ ننا راج اٹ ہم دا صفت آتے مون آ دننگے تو نن پاکستان ءِ اسہ سوگو و توانا ملک اس جوڑ کننگ اٹ سرسہب مرینہ۔ داکان مست اسکاؤٹس ٹیبلو پیش کرے و چندی اسکاؤٹنگ سرجز آتا درشانی ءِ ہم کریر۔
