اسلام آباد۔ 12 مارچ (اے پی پی) بنجائی وزیر حوالکاری و شینکاری سینیٹر شبلی فراز پارینے کہ اپوزیشن سینیٹ نا پولنگ بوتھ اٹی اودیم کیمرہ خلنگ نا راگ اس کرینے۔ ہرافک واردات کریر اوفک تینٹ واردات نا جاگہ غا سرمسر، اپوزیشن ءِ داوڑنا راگ کرسا شرم بروسس، اپوزیشن مدام پیسہ و دھڑکو ترسا کرینے۔ نن اودیم کیمرہ خلنگ نا واقعہ نا تہہ اسکان کانہ، زموار آتے پاش کننگک، ننا کوشست ءِ کہ ملک ءِ وڈی خور ٹولہ غان خلاصی ترفنگے، واقعہ نا پورو و شفاف جاست وپاست بایدے مرے، وزیراعظم عمران خان اولیکو دے آن شفافیت و شو آف ہینڈز انا ہیت ءِ کرسا کرینے ہراڑکن نن عملی وڑاٹ پارلیمان، الیکشن کمیشن و سپریم کورٹ آ ہنان۔ داخیال آتا درشانی ءِ او پارلیمنٹ ہاؤس نا پریس بریفنگ روم اٹی سینیٹر فیصل جاوید تون اوار صحافی تتون گپ وتران کرسا کرے۔ سینیٹر شبلی فراز پارے کہ پوسکن گچین مروک آ سینیٹ نا باسک آتا سوغندی آن مست اپوزیشن نا گندہ انگا چم پاش مسنے، دافک تینٹ واردات کریر و تینٹ واردات نا جاگہ غا سرمسر، دافک داوڑنا کارروائی تا ماسٹر مائنڈ ءُ، نن اودیم کیمرہ خلنگ نا واقعہ نا تہہ اسکان کانہ و زمواری آتے پاش کننگک۔ اوپارے کہ دامخلوق ءِ وونٹ مسترد کننگ آن ہلیس وونٹ دُزی کننگ اسکان نا وڑوڈول ءِ پارہ و ہنداسوب ءِ کہ قومی اسمبلی ٹی ننا گیشتری ئس، اقلیت اٹی مرساہم اوفتا اومیتدار سرسہب مریک ودافک تدوک آ نن ہم اختہ ئسر۔ اوپارے کہ نن پارلیمنٹ اٹی ہم ساف گچین کاری و شوآف ہینڈ اکن ہنان ولے اوفک دانا مخالفت ءِکریر و اینو ہم نن اوفتے چیلنج کینہ کہ شو آف ہینڈ آ بریر ولے دا اودیم سلاہ درشانی نا کمک اٹ دھونس و دھاندلی کننگ نا قائل ءُ، اینو اوفک پولنگ بوتھ اٹی اودیم کیمرہ نا تینٹ پیدواری ءِ کرسا راگ کریر، نن داواقعہ نا جاست وپاست ءِ کرفینہ و دانا تہہ اسکان کانہ۔ داوخت آ سینیٹر فیصل جاوید پارے کہ دافک دُزی ہم کیرہ و ایف آئی آر ہم کرفرہ۔ قوم اوفتا کڑد آن جوانی اٹ واقف ءِ۔ ہرا پوسکن آ پولنگ بوتھ جوڑ مننگ والا ءِ نن اونا ہم جاچ ءِ ہلینہ۔ یوسف رضاگیلانی نا گچین کاری آن پد اینو نا سوغندی دود آن مست انا حرکت ءِ مچ آ قوم خنانے، نن ہر گچین کاری ءِ شفاف خوانہ و چیلنج کینہ کہ داسہ ہم دااوپن بیلٹ آ بریر، داسرسہب مننگ کپسہ۔ داحرکت آتا پداٹ اوفتا اسہ مسخت اسے کہ این آر او تننگےہرااوفتے رسینگپک۔ سینیٹر فیصل جاوید پارے کہ داہیت تو غٹ انا مون آ بسنے کہ دیر اس شفافیت نا ہیت ءِ کیک و دیراس اودیم سلاہ درشانی نا ہیتءِ کرسا اودیم کیمرہ غاتون ہلنگک، داوونٹ مسترد مننگ آن ہلیس الیکٹرانک دھاندلی اسکان نا ہرچم انا آزموندہ کار ءُ۔ معاملہ نا جاست وپاست بھاز المی ءِ تانکہ قوم ءِ اوفتا اسل چہرہ ءِ نشان تننگ مرے۔ اوپارے کہ اخلاقیات، زرگزران و ہربشخ ءِاوفک بھس کرینو، اسہ پین سوج اسے نا ورندی ٹی بنجائی وزیر حوالکاری و شینکاری پارے کہ ہرکس کہ میدان آ کاہک او کٹنگ کن کاہک ولے گیشتری مفننگ آن پد ہم قومی اسمبلی ٹی اقلیت نا اومیتدار کٹنگ آ سوج تو مریک۔ وزیراعظم عمران خان مدام شفافیت و میرٹ ءِ اولیت تس، اوکرکٹ نا میدان اٹ ہم بے کنڈہلوک ایمپائر درستی راستی کرفے، ہنداخاطرآن او شو آف ہینڈانا ہیت ءِ کیک۔ اسہ پین سوج اسے نا ورندی ٹی بنجائی وزیر پارے کہ مچ آ قوم واقف ءِ کہ ترک خاتون اول نا تروک آ ٹیکی ءِ داتینا اُراغا دریسر و تینا قائد نا کرپشن ءِ بچفنگ کن وزارت عظمیٰ غان استیفہ تسر۔
