سید مظفر حسین شاہ چیئرمین و ڈپٹی چیئرمین سینیٹ نا گچین کاری کن وونٹ بِٹنگ نا وڑوڈول آن معلومدار کرے

اسلام آباد۔ 12 مارچ (اے پی پی) سینیٹ نا خصوصی دیوان کن پریزائیڈنگ آفیسر سید مظفرحسین شاہ چیئرمین و ڈپٹی چیئرمین سینیٹ نا گچین کاری عمل نا بابت بڑزکو ایوان نا ارٹمیکو سیشن بناکننگ تون وونٹ بِٹنگ نا وڑوڈول آن معلومدار کرے۔ جمعہ نادے آ بڑزکو ایوان نا دیوان اٹی اوپارے کہ اسہ باسک اسے ہم موبائل فون، کیمرہ و برقی ازباب آتا پولنگ بوتھ انا تہہ ٹی اتنگ نا موکل مفک۔ ہر 25 وونٹ آن پد مہر ءِ بدل کننگک تانکہ سیاہیک تنک مفس، پولنگ ءِ 5 بجہ غا بند کننگک۔ اوپارے کہ پولنگ نا عمل پورو مننگ آن پد حساب مریک و ہرا چیئرمین گچین مریک او تینا عہدہ نا سوغند ہرفک ہرانا کماشی ٹی ڈپٹی چیئرمین سینیٹ نا گچین کاری نا کارروائی بناکیک۔ پریزائیڈنگ آفسیر پارے کہ چیئرمین سینیٹ نا گچین کاری کن سینیٹ نا کل 100 آن 99 باسک تینا حق ءِ کاریم اٹ اتنگ کیرہ۔ بیلٹ پیپر زیان مننگ نا دروشم اٹ ووٹر پریزائیڈنگ آفسیر تون رابطہ کرسا ارٹ میکو بیلٹ پیپر اس جاری کرفنگ کیک۔ اووونٹ کاسٹ کننگ آن پد بیلٹ پیپر ءِ فولڈ کننگ نا وڑوڈول آن ہم باسک آتے معلومدار کرے۔ پریزائیڈنگ آفیسر نا پارت آ سیکرٹری الیکشن کمیشن باسک آتے خورک بیلٹ باکس ءِ نشان تس اوکان پد غٹ انا ساڑی گری ٹی اودے بند کننگا۔ اوکان پد چیئرنا موکل اٹ سیکرٹری سینیٹ سینیٹ نا باسک آتا پن ءِ ہلسا پولنگ نا عمل نا بناءِ کرے۔