ڈاکٹر فردوس عاشق اعوان نا پارلیمنٹ ہاؤس نا پیشن میڈیا تون گپ وتران

اسلام آباد۔ 12 مارچ (اے پی پی) وزیراعلیٰ پنجاب نا خصوصی کمکار ڈاکٹر فردوس عاشق اعوان پارینے کہ اپوزیشن سینیٹ نا گچین کاری تا نتیجہ غاتیان نرنگ نا کسر اس اختیار کننگ کن بہانہ پٹنگ ءِ، سینیٹ گچین کاری جمہوری ءُ عمل اسے، نن چنکا صوبہ و اوار مروک پسماندہ علاقہ غاتیان چیئرمین و ڈپٹی چیئرمین نااومیتدار ایسونن، اپوزیشن والاتے مروسس کہ اوچنکا صوبہ نا اومیتدار نا مقابلہ ٹی تینا اومیتدار اس اتپروسر ولے اوفتے داڑتون ہچ ءُ کاریم اس اف، اپوزیشن راگ کرسا ٹی وی سکرین آ زند سلنگ خواہک۔ تدوک آ دے ہم اپوزیشن راگ کننگ نا کوشست کریسس، اینو ہم سینیٹ اٹ اپوزیشن باسک آک اسہ پین راگ اسے ناکوشست کرری ہرا فلاپ مس۔ داہیت ءِ او جمعہ نادے داڑے پارلیمنٹ ہاؤس نا پیشن صحافی تتون گپ وتران کرساپارے۔ ڈاکٹر فردوس عاشق اعوان پارے کہ اپوزیشن شکست آن ہبکہ مسنے و نرنگ نا کسر اس اختیار کننگ کن بہانہ پٹنگ ءِ۔ اوپارے کہ سینیٹ گچین کاری ایمان و کفر انا جنگ اف، پی ڈی ایم باتننگ ءِ سگنگ نا ہم وس ودی کے، انتئے کہ اوفتے تینا شکست نظر بسنے ہراڑکن او اودیم کیمرہ غاتا راگ کریر۔ اوپارے کہ تینا نادان سنگت آتے پاننگ خوانہ کہ اوفتا اخس کہ مرضی ءِ شور کیر، غوغا کیر، بھلابھلا ماڑی و میڈیا نا سکرین آ و دوبہ خلسا زند مننگ نا کوشست کننگ ءُ و داکان بیدس ہچ اس اف۔ اوپارے کہ نن سینیٹ گچین کاری نا عمل ءِ پرامن تخنگ خوانہ و ننا است خواہی ءِ کہ سینیٹ نا تقدس ءِ بحال تخنگے۔