بڑزکو ایوان نا پوسکن آ باسک آتا سوغندی دود، رول 9 انا رداٹ چیئرمین و ڈپٹی چیئرمین نا گچین کاری تیان بیدس ہچ ءُ باندات اسے ہرفنگ مفک، پریزائیڈنگ آفیسر سید مظفر حسین شاہ

اسلام آباد۔ 12 مارچ (اے پی پی) سینیٹ نا خصوصی دیوان نا پریزائیڈنگ آفیسر سید مظفر حسین شاہ پارینے کہ بڑزکو ایوان نا رول 9 انا رداٹ خصوصی دیوان اٹی باسک آتا سوغندی دود و چیئرمین و ڈپٹی چیئرمین نا گچین کاری تیان بیدس ہچ ءُ باندات اسے ہرفنگ مفک۔ رضاربانی و فاروق نائیک سینیٹ نا چیئرمین رہینگانو اوفک سگ انا درشانی ءِ کیر، وونٹ انا سکریسی ءِ برقرار تخنگک۔ بڑزکو ایوان نا دیوان اٹی اپوزیشن باسک آتا برانز آ تینا رولنگ ءِ ترسا سید مظفرحسین شاہ پارے کہ رول 9 اٹ دانا وضاحت ءِ کننگانے کہ خصوصی دیوان اٹ پوسکن گچین مروک آ باسک آتا سوغندی دود و چیئرمین و ڈپٹی چیئرمین نا گچین کاری تیان بیدس پین ہچ ءُ کارروائی اس مفک۔ اوپارے کہ چیئرمین و ڈپٹی چیئرمین نا گچین کاری عمل اٹ وونٹ انا سکریسی ءِ برقرار تخنگک۔