سی ٹی ڈی پولیس کوئٹہ نا علاقہ سریاب روڈ آ کارروائی کرسا اِرا دہشت گرد ءِ دزگیر کرسا دہشت گردی نا ڈٹ ءِ بے سہب کرے، دہشت گرد آتا تعلق کالعدم تنظیم آن پاننگانے، ترجمان سی ٹی ڈی

کوئٹہ۔ 12 مارچ (اے پی پی) سی ٹی ڈی پولیس کوئٹہ نا علاقہ سریاب روڈ آ کارروائی کرسا اِرا دہشت گرد ءِ دزگیر کرسا دہشت گردی نا ڈٹ ءِ بے سہب کرے، دہشت گرد آتا تعلق کالعدم تنظیم آن پاننگانے۔ سی ٹی ڈی کوئٹہ نا ترجمان نا رداٹ کاؤنٹر ٹیررازم ڈیپارٹمنٹ کوئٹہ نا اودیم حوال ملاسس کہ کالعدم بلوچ لبریشن آرمی نا اِرادہشت گرد سیکورٹی کارندہ غاتیا جلہو نا غرض اٹ کوئٹہ غا سرمننگ ءُ۔ سی ٹی ڈی کوئٹہ نا ٹیم دا حوال آ کوئٹہ نا علاقہ لنک سریاب روڈ آ چھاپہ خلسا ہڑتوم آدہشت گرد آتے دزگیر کرے، دوبہ دار آتا کوزہ غان دھماکہ خیز مواد و بمب جوڑ کننگ اٹ کاریم اٹ اتوک آ ازباب دوئی کننگا۔ ترجمان نا رداٹ ہڑتوم آ دزگیر دہشت گرد آک امنا کریر کہ کالعدم تنظیم نا راہشونک اوفتے کوئٹہ ٹی دہشت گرد کارروائی نا ٹاسک تسوسر۔ سی ٹی ڈی ترجمان پارے کہ دوبہ دار آک کوئٹہ ٹی ساڑی بی ایل اے نا ایلو کارندہ غاتا بارواٹ ہم معلومداری تسر ہرافتا دزگیری کن پین چھاپہ خلنگ انگءِ۔ سی ٹی ڈی دزگیر دہشت گرد آتا برخلاف تھانہ سی ٹی ڈی کوئٹہ ٹی مقدمہ درج کننگ آن پد مستی جاست وپاست نا بناءِ کرینے۔