کوئٹہ۔ 12 مارچ (اے پی پی) کمشنر مکران شاہ عرفان غرشین مکران ڈویژن نا ضلع پنجگور نا دورہ ءِ کرے دا دورہ ٹی ایلو بڑزکو سرکاری کمامدارآک ہم اوڑتون اوار ئسر۔ تینا دورہ پنجگور نا بنائی ریسہ ٹی او ضلع پنجگور اٹ چندی محکمہ غاتا کارندہ غاتون اوڑدہی کرے۔ داوخت آ او سرکاری آفیسر آتیا زور شاغسا پارے کہ او ایمانداری اٹ تینا فرض ءِ پورو کیر و السی ویل آتا ایسری ءِ تینا اولیت آتیٹی مون اٹ تخر، تانکہ مخلوق نا ویل آک اوفتا درگہ غا ایسر مننگ کیر۔ اوسرکاری آفیسر آتے پارت کرے کہ او سرکاری وخت و پاس انا سختی اٹ پابندی ءِ کیر و او تینا دفترآتیٹی حاضری ءِ پک کیر۔ داوخت آ اوضلعی انتظامیہ غا زور شاغسا پارے کہ او باقاعدہ سرکاری دفترآتیا دورہ ءِ کرسا کیر تانکہ گھوسٹ ملازم آتا برخلاف کارروائی کننگ کرے۔ اوکان پد کمشنر مکران ڈویژن ضلع پنجگور اٹی چندی شونداری ڈٹ آتا دورہ ءِ کرے و ہموڑے برجاکاریم نا معائنہ ءِ کرے۔ داوخت آ او تعلقدار ادارہ غاتا کارندہ غاتیا زور شاغسا پارے کہ او دا پروجیکٹ نا باقاعدگی اٹ چاروکی ءِ کیر تانکہ دا ڈٹ وخت آ پوروی اسکان سرمرے، داٹی او تعلقدار کمامدار آتیا پیدوار کرسا پارے کہ تعمیراتی میٹریل ءِ باقاعدگی اٹ چیک کننگےو شونداری کاریم نا آب آ اسُل سمجھوتہ کننگپک۔
