اسلام آباد۔ 11 مارچ (اے پی پی) تحریک انصاف نا راہشون سینیٹر فیصل جاوید پارینے کہ سینیٹ نا گچین کاری تیٹی حکومتی اومیتدار سرسہب مریک، عمران خان وڈی خوری نا برخلاف سلوک ءِ وخت اس کہ مچ آ قوم اوڑتون سلوک ءِ۔ اپوزیشن سینیٹ چیئرمین نا گچین کاری تیٹی ہم مخلوق نا ضمیر ءِ ہلنگ نا پورو کوشست کننگ ءِ، دامدام ہارس ٹریڈنگ کن پیسہ خلسا بسنو۔ بروک آ دے تیٹی کبینی ٹی کمتی بریک۔ پنچ شنبے نادے آ میڈیا تون گپ وتران کرسا اوپارے کہ تحریک انصاف ڈپٹی چیئرمین سینیٹ نا نشست ءِ مسکوہی فاٹا ءِ تسنے۔ سینیٹ نا ساڑی آ گچین کاری تیٹی یوسف رضاگیلانی نا گچین کاری غٹ انا مون آٹی ءِ۔ اونا مار انا ویڈیو لس مون آ بس۔ مسکوہی وزیر اعظم پرویز اشرف قومی اسمبلی ٹی امنا کرینے کہ ایڈوانس ہلکونن، بابا، مریم نواز میڈیا غا پاریر کہ ن لیگ انا ٹکٹ چلینگانے، نن خوانہ کہ ملک اٹ شفاف گچین کاری مرے۔ کرپشن ءِ ہر کہول آ چٹفنگ عمران خان نا مشن ءِ وخت اس کہ دانا برخلاف اپوزیشن اونا رکھ ءِ خواہک۔ سینیٹ اٹ تحریک اںصاف گیشتری جماعت ءِ۔ اوپارے کہ حکومت کبینی نا چٹفنگ کن گچین ءُ پیکج اس ایسونے۔ حکومت ءِ کبینی نا احساس ارے و دانا چٹفنگ عمران خان نا اولیت ءِ۔ داسہ لس بندغ نا فائدہ کن کانود جوڑمریک۔
