اسلام آباد۔ 11 مارچ (اے پی پی) چیئرمین نیب جسٹس جاوید اقبال نا ’’احتساب غٹ اکن‘‘ پالیسی نا جوان ءُ بھرم اس مون آ بسنے۔ پنچ شنبے نادے آ جاری بیان نا رداٹ چیئرمین جسٹس جاوید اقبال داعہدہ ءِ سنبھالنگ آن پد 3 سال مست آگاہی، تدارک، انفورسمنٹ و احتساب غٹ اکن نا انسداد وڈی خوری نا جامع و گچین ءُ قومی حکمت عملی اس جوڑ کرے ہرانا جوان ءُ بھرم اس مون آ بسنے۔ متبر قومی و جہانی ادارہ کون آ ٹرانسپیرنسی انٹرنیشنل پاکستان، جہانی اقتصادی فورم، گلوبل پیس کینیڈا، پلڈاٹ و مشال پاکستان وڈی خوری نا توننگ کن نیب انا کوشست آتا ستاءِ کرینو۔ گیلانی اینڈ گیلپ سروے نا رداٹ 59 درسد مخلوق نیب آ پت کیرہ۔ نیب تدوک آ مسہ سال اٹی چیئرمین نیب جسٹس جاوید اقبال نا پامدار کماشی ٹی وڈی خور زموار آتیان 487ارب روپئی ہلسا قومی خزانہ ٹی جمع کرفینے ہراکہ تدوک آ سال انا مقابلہ ٹی جوان ءُ سرسہبی اسے۔ احتساب عدالت آتیٹی نیب انا مقدمہ غاتیٹی جم سزاتا کچ 68.8درسد ءِ۔ نیب انا داوخت آ چندی احتساب عدالت آتیٹی وڈی خوری نا 1230مقدمہ سماعت اٹی ءُ ہرافتا مالیت 947 ارب روپئی آن زیات جوڑ مریک۔ اینو وڈی خوری نا چٹفنگ مچ آ قوم انا توار مسنے۔ وڈی خوری نا چٹفنگ و میگاکرپشن وائٹ کالر کرائم ءِ ایسر اسکان سرکننگ نیب انا اولیت ءِ۔ نیب سارک اینٹی کرپشن فورم نا چیئرمین ءِ۔ نیب 7 ملک آتیکن رول ماڈل نا حیثیت تخک۔ نیب اقوام متحدہ نا انسداد وڈی خوری کنونشن(یواین سی اے سی) نا رداٹ پاکستان نا فوکل ادارہ ءِ۔نیب ہمو ادارہ ءِ ہراوڈی خوری نا توننگ اٹ کمکاری ٹی ودکی و سی پیک نا رداٹ ڈٹ آتا چاروکی کن چین اتون مفاہمت نا یات داشت آ دستخط کرینے۔ نیب راولپنڈی پوسکن ءُ فرانزک سائنس لیبارٹری اس جوڑ کرینے۔ نیب تینا انویسٹی گیشن آفیسر آتے وائٹ کالر کرائم نا جاست وپاست کن پوسکن آ خواست آتا رداٹ تربیت فراوان کننگ کن نیب ہیڈکوارٹرز اٹ پاکستان اینٹی کرپشن ٹریننگ اکیڈمی اس جوڑ کرینے۔ نیب ورناتے اول وئی ٹی کالج و یونیورسٹی تا طالب علم آتے وڈی خوری نا خراب انگا زہم تیان معلومدار کننگ کن ہائیر ایجوکیشن تون مفاہمت نا یات داشت آ دستخط کریسس۔
