اسلام آباد۔ 11 مارچ (اے پی پی) وزیراعظم عمران خان بلوچستان نا الس نا محرومی تا ازالہ ءِ کننگ کن غٹ بنجائی وزارت آتا سیکرٹری تے ہرتُو بلوچستان نا دورہ ءِ کننگ نا پرمان کرینے۔ وزیراعظم آفس نا میڈیا ونگ آن جاری بیان نا رداٹ دا چرجوئی ٹی وزیراعظم آفس آن باقاعدہ پرمان نامہ جاری کننگانے۔ پرمان نامہ نا رداٹ صوبہ بلوچستان نا الس ءِ مون تروک ویل آتا ایسری کن غٹ بنجائی وزارت آتا سیکرٹری تے ہرتُو صوبہ نا دورہ ءِ کننگ نا پرمان کننگانے۔ پرمان نامہ ٹی پاننگانے کہ غٹ بنجائی سیکرٹریک ہرتُواٹی کم از کم اسہ وار صوبہ بلوچستان آ تینٹ کار و تینا وزارت، ڈویژن، محکمہ تون تعلقدارباندات آتے اولیتی بنداو تیا ایسر کیر۔ غٹ بنجائی سیکرٹری صاحب آک چیف سیکرٹری بلوچستان تون ملسا وزٹ پروگرام اس جوڑ کیرہ و وزیراعظم آفس ءِ دابابت معلومدارہم تخرہ۔ غٹ سیکرٹری صاحب آک دورہ غان پد سرجم رپورٹ ءِ باقاعدگی اٹ وزیراعظم آفس ءِ گدریفرہ۔
