اسلام آباد۔ 10 مارچ (اے پی پی) بنجائی وزیر تعلیم و کسبی تربیت شفقت محمود پارینے کہ تعلیمی ادارہ غاتیٹی مون آبروک آ کورونا کیس آتا سوب آن فیصلہ کننگانے کہ بنجائی دارالحکومت اسلام آباد و پنجاب نا 7 بھلا شار تیٹی 15 مارچ آن 28 مارچ اسکان تعلیمی ادارہ غاتیٹی ہتم نا چھٹیک مریرہ، سندھ و بلوچستان اٹی 50 درسد چناک اسکول آتیا بریرہ، ہراتعلیمی ادارہ غاتیٹی امتحانک مننگ ءُ ہموڑے امتحانک برجاسلرہ۔داخیال آتا درشانی ءِ او چارشنبے نادے آ نیشنل کمانڈ اینڈ آپریشن سینٹر اٹ دیوان آن پد وزیراعظم نا خصوصی کمکار نیشنل ہیلتھ سروسز، ریگولیشنز اینڈ کوآرڈینیشن ڈاکٹر فیصل سلطان تون اوار میڈیا حوال اٹی کرے۔ اوپارے کہ اینونا دیوان اٹی مچ آ ملک اٹی کورونا نا تالانی و تعلیمی ادارہ غاتا بارواٹ سرجم تا جاچ ءِ ہلنگا۔ اوپارے کہ کورونا دین نا کیس آتا بابت سندھ و بلوچستان اٹی حالیت آک تقریباجوان ءُ وخت اس کہ پنجاب و خیرپختونخوا، آزاد کشمیر اٹی ویل مون آ بسنے۔ سندھ و بلوچستان اٹی 50 درسد چناک اسکول آ بریرہ۔ اوپارے کہ راولپنڈی، فیصل آباد، گوجرانوالہ، لاہور، گجرات، ملتان اٹی 15 آن 28 مارچ اسکان تعلیمی ادارہ غاک بندمریرہ۔ سیالکوٹ اٹی ہم 15 مارچ آن 2 ہفتہ کن اسکول آک بند مریرہ۔ اسلام آباد نا تعلیمی ادارہ غاک ہم بند مریرہ۔ صوبائی حکومت آک حالیت آتا خراب مننگ آ اسکول آتے بند کننگ کیرہ۔ اوپارے کہ صوبائی حکومت آک خوڑتی اٹ باندات آتا جاچ ءِ ہلیر۔ ہراادارہ غاتیٹی امتحانک مننگ ءُ او برجاسلرہ۔ اوپارے کہ اسکول آتے تینٹ ہم مانیٹر کرسا کیر۔داوخت آ وزیراعظم نا خصوصی کمکار ڈاکٹر فیصل سلطان پارے کہ ملک اٹی کورونا دین انا کیس آتیٹی ودکی مننگ ءِ و ننا ہیلتھ سسٹم آ زور ودنگ ءِہرانا سوب آن گڑاس اہم ءُ فیصلہ کننگانے۔ اوپارے کہ پاکستان اٹی 60 سال آن زیات عمررسیدہ بندغ آتے کورونا ویکسین خلنگ نا عمل نا بناءِ کننگانے۔ اوپارے کہ مچ آ ملک اٹی شام انا 6 بجہ غان تفریحی پارک آتے بند کننگ نا فیصلہ کننگانے وخت اس کہ اسلام آباد اٹی دفتر آتیٹی 50 درسد عملہ نا حاضری نا فیصلہ غا ہم عملدرآمد برجاسلک۔ ڈاکٹر فیصل سلطان پارے کہ سینماہال آتے 15 مارچ آن ملنگ نا فیصلہ ءِ پدی ہلنگانے و ہوٹل آتا تہٹی کن و خور آ ہم پابندی مریک وخت اس کہ شادی ہال تا بابت ہم پالیسی برقرار سلک۔ انتظامی ادارہ غاک سمارٹ لاک ڈاؤن آ عمل کیر، تدوک آ ہفتہ ٹی کیس آتیٹی ودکی مس۔ کورونا کیس آتا ودنگ نا سوب آن ہسپتال آتیا بھاریم ودک۔ اوپارے کہ تفریحی پارک آتے شام انا 6 بجہ غا بند کننگ نا فیصلہ کننگا، ڈاکٹر فیصل سلطان پارے کہ ماسک انا کاریم اٹ اتنگ آ پدریسہ زور شاغنگ اُن۔ ناجوڑی نا تالانی نا تناسب آن سمارٹ لاک ڈاؤن خلسا کینہ۔
