اسلام آباد۔ 10 مارچ (اے پی پی) ازبکستان نا وزیر خارجہ عبدالعزیز کامیلوف چارشنبے نادے آ وزارت خارجہ ٹی ڈل اتون اوار تینا پاکستانی ہم منصب مخدوم شاہ محمود قریشی تون اوڑدہی کرے۔ ہڑتوم آ وزیر خارجہ غاک پاکستان و ازبکستان نا نیام اٹ ہڑتوم آ کنڈآتا واپار تون اوار کثیر الجہتی بشخ آتیٹی ہڑتوم آ کنڈآتا کمکاری ءِ مون آ دننگ آ امنا کریر۔ ترجمان دفترخارجہ نا رداٹ اوڑدہی ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاریءِ مون آ دننگ تون اوار تین پہ تینی است خواہی نا اہم علاقائی و جہانی امور آ گپ وتران کننگا۔ وزیر خارجہ پارے کہ پاکستان، ازبکستانءِ وسط ایشیائی ملک آتیٹی اسہ اہم ءُ ایلم ملک اس تکک۔ شاہ محمود قریشی پارے کہ پاکستان و ازبکستان نا نیام اٹ عقیدہ، مشترک تاریخ و دودوربیدگی ہم آہنگی آ مبنی خوشگوار تعلقداری ءِ ہرا کثیر الجہتی بشخ آتیٹی ہڑتوم آ کنڈآتا تعلقداری تا مون آ دننگ کن سوگو بنداو اس فراوان کیک۔ وزیر خارجہ ازبک تینا ہم منصب ءِ داکان مست، میونخ و ماسکو ٹی مروک آ اوڑدہی تا بابت پارسا پارےکہ پاکستان، ازبکستان تون زرگزرانی شریداری نا مون آ دننگ، امن، شونداری و رابطہ غاتے ودفنگ آ چکار کرینے۔ اہم علاقائی و جہانی فورم خاص وڑاٹ اقوام متحدہ او۔ آئی۔سی۔ او و ایس۔ سی ۔او ٹی ہڑتوم آ ملک آتا نیام اٹ خڑکی رابطہ ستاکڑزک۔ شاہ محمود قریشی پارے کہ ہڑتوم آ ملک آک علاقائی رابطہ غاتے ودفنگ خاص وڑاٹ پاکستان، اوغانستان و ازبکستان نا نیام اٹ ٹرانس اوغان ریلوائی ڈٹ انا زوت تفنگ کن خڑکی کمکاری ءِ برجاتخانو۔ وزیر خارجہ تینا ازبک ہم منصب ءِ اوغانستان اٹی امن کن پاکستان نا خیر خواہی کوشست و اوفتا بھرم تیان معلومدار کرے۔ ہڑتوم آ وزیر خارجہ غاک پاکستان و ازبکستان نا نیام اٹ ہڑتوم آ کنڈآتا واپار تون اوار کثیر الجہتی بشخ آتیٹی ہڑتوم آ کنڈآتا کمکاری ءِ مون آ دننگ آ امنا کریر۔ ازبک وزیر خارجہ عبدالعزیز کامیلوف ڈیہہ ٹی رابطہ غاتا مون آ دننگ و امن کن پاکستان نا کوشست آتا ستاءِ کرے و گمان ظاہر کرینے کہ ازبک وزیر خارجہ کامیلوف نا ساڑی آ دورہ پاکستان آن ہڑتوم آ کنڈآتا رابطہ غاتا رفتار ءِ پین ودفنگ اٹ کمک رسینگک وخت ا سکہ تین پہ تینی فائدہ نا بشخ آتیٹی ساڑی ہڑتوم آ کنڈآتا کمکاریءِ پین سوگو کننگ اٹ کمک رسینگک۔
